uMthunywa
Cornelius Luphahla
IMADOLO nzima imuli yakoMabaleka esigabeni sakoSigola ebisiphelelwe ngabantwana sekuvele ukuthi ibihlala londofa olewigi onguye “obesidla” abantwana.
Lesisiga senzakale ngoLwesihlanu kuviki ephelileyo lapho uNkosikazi Silvia Mabaleka okhutshelwe khona undofa osadoli oloboya njalo egqoke iwigi.
Undofa lo kubikwa ubeselesikhathi eside ekhathaza isakhamuzi lesi ngokusibulalela abantwana lokusihlukuluza emacansini, uMthunywa ukuzwile lokhu.
UMthunywa ongelampontshi uxhumane lesinye isakhamuzi sakule indawo uNkosazana Simeleni Dube wachaza ukuthi wayekhona mhla kukhitshwa undofa lo.
“Angilamathe ngilapha, undofa owakhitshwayo wayegqoke iwigi emnyama tshu njalo eloboya obesabekayo. Isimanga yikuthi wayengelazandla kodwa efana lomuntu,” kutsho uNkszn Dube.
Uqhubekele phambili njalo walandisa ukuba undofa lo kuthiwa wayehlukuluza uNkkz Mabaleka engakwazi.
“Abaphurofethi bathi bembamba undofa lo bathi ubelala loNkkz Mabaleka njalo ubesefuna ukumbulala abuye alale labanye abesifazana esigabeni lesi. Kutsho ukuthi sonke sowasiqeda undofa lo njengoba siyabe singamboni nxa ekwenza lokhu,” kuchaza uNkszn Dube.
Ebuzwa ngale indaba uNkkz Mabaleka uvumile ukuthi indaba le uyayazi njalo yenzakele emzini wakhe.
“Kuliqiniso sibili ukuthi abaphurofethi bakhupha undofa osanyamazana emzini wami bathi ubengikhathaza kakhulu.
Undofa lo wayesengihluphile yikho nje ngabiza abaphurofethi ukuthi bazongisiza,” kutsho uNkkz Mabaleka.
Uqhubekele phambili njalo walandisa ukuba undofa lo kuthiwa wayegciniswe ngomakhelwane bakhe.
“Abaphurofethi laba bathi undofa lo wagciniswa ngomunye wabomakhelwane bami ngoba belomhawu wokuthi ngihlezi kuhle kangiceli lutho kibo. Bathi undofa lo ubethi engaphanda emzini wami kufe umntanami kumbe umzukulu ngoba uyabe ebagqibela.
“Ngikhuluma nje sengaze ngasala labantwana abane kuphela mina ngangilabalitshumi. Bonke laba kuthiwa babebulawa ngundofa lo ngoba babegula okungamalanga okulutshwane badlule.
“Ebusuku lobuthongo bebungasabuyi njalo bengithi ngingalala ngithwale nzima emaphutsheni kodwa lokhu bekukhiphile okuyinyamazana lokhu sengilala,” kulandisa uNkkz Mabaleka.
Kusenjalo kuzwakale ukuthi abaphurofethi laba babuye bakhipha umangoye kwesinye isakhamuzi esingumakhelwane kaMabaleka okubikwa ubesebenza ukuhlasela umninimuzi lo abuye njalo antshontshe imali lokudla.
UNkosazana Eveline Tshuma ongumnikazi womuzi okukhitshwe khona umangoye lo ubikele intatheli ukuba kuliqiniso lokhu okukhulunywayo.
“Kuliqiniso sibili ukuthi abaphurofethi bathi kulomangoye owasetshenzwayo lapha ekhaya njalo ubengowokungithakatha egciniswe ngomakhelwane. Lami nginje bengihlala ngigula bathi nguye umangoye lo obefuna ukungibulala,” kutsho uNkszn Tshuma.
