uMthunywa
YiNtatheli kaMthunywa
USAZIWAYO kwezenguqu uPeter “Nsukuzonke” Ndlovu, wayehlohla mihla yonke ekuqembu leHighlanders, lakuma-Warriors, waba labantwana abanengi, kodwa khathesi uyehluleka ukubagcina.
Ukhulume engakufihli uNdlovu ukuthi usefike komlindi uyacina esikhwameni sakhe nanko utshele umthethwandaba weJohannesburg High Court ukuthi udonsa nzima ukubhadala isondlo sabantwabakhe abangu-13.
Lokhu ukuveze ngesikhathi emi phambili kukajaji ngesikhathi elinye inina alomntwana lalo lifuna imali yesondlo.
Ngokubika kwephephandaba le-City Press kumalanga amabili adluleyo, uNdlovu, ufike emthethwandaba edinga ukuba ancediswe ekuthini kwehliswe isondlo somntanakhe ebesifunwa linina leli. Phambilini, ngomnyaka odluleyo, umthethwandaba weJohannesburg Magistrates Court wawuthe uNdlovu abhadale iR30 000 ngenyanga.
Imali le, uNdlovu uthe kayenelisi. I-City Press ibike ukuba kumaphepha awathumele emthethwandaba, uNdlovu isondlo esifunwa ngumama womntwana siphezulu kakhulu ngoba singaphazamisa lesondlo sabanye abantwabakhe abangu-11.
Umama womntwana kaqanjwanga ngoba kuvikelwa umntwana lo.
Kubikwa umthethwandaba uvumele ukuthi uNdlovu akhiphe iR12 000 ngenyanga ukondla umntanakhe. Imali le izakhitshwa kuholo lakhe kuqembu leMamelodi Sundowns lapho angumaneja khona.
UNdlovu kaqalisi ukuba semlonyeni yabantu ngokwehluleka ukugcina abantwana lokulwa lezithandwa zakhe.
Akhona amanina amdonsela emthethwandaba ngendaba zesondlo.
UNdlovu, wakhulela elokitshini leMzilikazi koBulawayo. Ekupheleni kweminyaka yama-1980s kusiya kuma-1990s, uNdlovu wabayinsika yokuphumelela kwesikolo seMzilikazi High School kumdlalo wenguqu. Ngesizini ka-1992, wenelisa ukungena kuHighanders eleminyaka engu-16 yokuzalwa. Wasuka lapho wabizwa ku-Coventry City, lapho afika khona wasukumisa ababukeli bomdlalo ngethalenta lakhe. — Ubulembu
