uMthunywa
Thokozile Mbedzi
ZILOKHE zinkemile izakhamizi zesigabeni seLimburgia Ranche eMwenezi ngemva kokuba abantwana ababili betshaywe ngamagetsi kwafa oyedwa, omunye walimala kakubi ngesikhathi belusile egangeni kuviki ephelileyo.
Kubikwa uWelcome Sihuma oleminyaka engu-12 utshaywe ngamagetsi wafa omunye wakhe walimala njalo ulalisiwe esibhedlela.
Ekhuluma lentatheli kaMthunywa uMnumzana Thembani Moyo uthe balahlekelwe ngumntwana oyedwa omunye walimala ngemva kokutshwaywa ngamagetsi egangeni.
“Sehlelwe liyezi elimnyama, silahlekelwe ngumntanethu omunye ulimele usesibhedlela ngemva kokutshaywa ngamagetsi belusile egangeni.
“Intambo zamagetsi lezi bezilenga phansi abantwana ngokungazi ukuthi zilomlilo kukhanya bafike bazidlalisa.
“Ekuqaleni intambo lezi bebengazifikeli bazama ukweqa bacina omunye esethwala uWelcome emahlombe wayayibamba yikho lapho okwenzakale khona inkemenkeme le ngoba ahle abatshisa bobabili bawela phansi,” kutsho uMnu Moyo.
Kubikwa uWelcome wahle wafela lapho kukanti lo omunye walimala umzimba wonke.
“Lo omunye wathwalelwa esibhedlela seNeshuro District Hospital,” kulandisa uMnu Moyo.
Isikhulumi samapholisa esabelweni seMasvingo uInspector Kudakwashe Dewa ebuzwa ngodaba lolu uvumile wathi solufikile ehofisini yabo.
“Udaba lwabantwana abatshaywe ngamagetsi ngesikhathi bezama ukudlalisa intambo solufikile ehofisini yethu.
“Amapholisa axwayisa uzulu ukuthi esabe intambo zamagetsi njalo bafundise labantwana ukuze baphephe engozini ezifana lalezi ngoba intambo lezi ngeke ukwazi nxa zilomlilo,” kuphetha uInsp Dewa.
