uMthunywa
YiNtatheli kaMthunywa
ABALIMI botshinda bakhangelele inzuzo engcono lonyaka njengoba uHulumende ebathembise impahla yokulima ukuze basizakale njengoba imali yokuthenga limpahla ihlupha abalimi abanengi.
Ekhuluma lentathelizindaba uMnumzana Davison Masendeke onguProvincial Agronomist weMatabeleland uveze ukuthi lokhu kube lusizo olukhulu kakhulu kubalimi ngoba abalimi botshinda bebebhekane lenhlupho ikakhulu ekuthengeni impahla yokulima. Uveze ukuthi umumo womkhathi walonyaka ubusubangela ukuthi abalimi abanengi balahlekelwe lithemba.
“Abalimi bathabile kakhulu ngoba bekungalula ukuthi bazithengele impahla yokulima, okunye njalo obekubaqeda amandla yikuthi umumo womkhathi ubusulahlise abalimi abanengi ithemba.
“UHulumende wenze isinqumo esihle sibili ngoba lowo lalowo ongafisa ukulima utshinda angayithola impahla le,” kutsho uMnu Masendeke.
Uqhubekele phambili esithi abalimi botshinda balenhlupho ezinengi ikakhulu nxa kusiza kumankampani anikeza abalimi impahla yokulima ngoba nxa sokumele bathengise utshinda kuyabe kumele bathengise kulawo mankampani njalo babanjelwa imali enengi kakhulu okwenza abanye bacine besekela ukulima isilimo lesi.
Lokhu kubangela ukuthi umlimi alahle ithemba ngokuphumelela kokulima isilimo lesi ngoba umsebenzi umlimi ayabe ewufake ekulimeni ucina ungasahambelani lemali ayitholayo.
“Abalimi botshinda bebelohlupho kakhulu olubangelwa ngamankampani avela phandle kwelizwe ababoleka impahla yokulima kuthi nxa umlimi sokumele athengise isilimo sakhe abanjelwe imali enengi kuthiwa ngeyesikwelede sempahla ayithathayo.
“Okwakhathesi njengoba uHulumende esezwe isikhalazo sabalimi laba, ngilethemba lokuthi bazathola inzuzo engcono,” kuveza uMnu Masendeke.
Wengezelele wathi uxwayisa abalimi botshinda ukuthi bengathengiseli amankampani abangawathembiyo utshinda ngoba balakho ukuqilwa bethengelwe ngemali engayisiyo ekhangelelweyo. Uthe yena kubalulekile ukuthi umlimi wotshinda abekwazi amakhampani okuthengisela utshinda ikakhulu la akaHulumende ngoba kuhle ukuthuthukisa ilizwe kulokuthi kunothiswe manye amazwe.
“Umlimi wotshinda kabe lenkampani yakhe eqondileyo eyiyo ayithengisela utshinda lwakhe, abalimi abanengi bazithola sebekhala ngoba belandele inkampani abangayaziyo besithi ilemali enengi kodwa becine sebekhala njalo sebethole kungela mali,” kulandisa uMnu Masendeke.
Uthe abalimi bathenjiswe ukuthi bazaphiwa inhlanyelo yotshinda, imithi yokuvikela isilimo lesi emikhuhlaneni eminengi, umquba wesilungu lakho konke okudingakalayo ekulimeni utshinda.
