uMthunywa
ABALANDELI beqembu elikhulu iHighlanders sebevumele phezulu kusimemezelo sekhansili ukuthi inkokheli zeqembu zilobe incwadi zicela uSodolobho wakoBulawayo lamakhansila ukuthi benikeze iqembu umhlabathi.
Kumaviki amabili adluleyo uSodobho wakoBulawayo uMartin Moyo wafuqela ingqobe kubakhokheli beBosso wabakhuthaza ukuthi bacele umhlabathi wokwakha inkundla.
Iphephandaba likazulu likhulume lenengi labasekeli beBosso ngemva kwalokhu, abakubone kulinyathelo elihle.
USodolobho uMoyo wabika phambili kwenkundla esithi: “Ngingakatshiyi umsebenzi, ngizathanda ukuthi ngifice ehofisini yami kulencwadi evela kuHighlanders icela umhlabathi wokwakha inkundla,” nguMoyo lo.
Abalandeli, ngokuzwa amazwi kaMoyo, bavumele phezulu bathi lesi yiso isikhathi sokuthi iHighlanders iqale ukusukumela phezulu.
Imibono yabalandeli igcwale ebulenjini lapho okuvele ukuba inkuthazo kaSodolobho uMoyo izwakele.
UCosmas Malaba olilunga leBosso eseZvishavane ubike ukuba nxa inkokheli zeqembu zingekela ukulandela lokho, ziyabe zehlulekile.
“Okutshiwo nguSodolobho sivumelana lakho sibili. Sekuyisikhathi eside iqembu lethu lithwala nzima ngokubhadaliswa imali ezinengi nxa liqhatshe inkundla zabanye abantu . . . singehluleka khathesi, angeke silunge.”
UMoses Maraha Nkomo oweHwange uthe kuyabongeka ukuthi ikhansili yakoBulawayo isikhululekile ukuthi inikeze iqembu elikhulu umhlabathi.
“Umhlabathi siyawufuna. Iqembu kumele ligijime lidinge usizo kwakhiwe okungokwethu,” nguNkomo lo.
Ekhuluma loMthunywa, uMgcini Nkolomi ongumgcinisihlalo webhodi yeHighlanders ubike ukuthi inkuthazo evela kuSodolobho yamukelekile.
Uthe ukuthola umhlabathi wokwakha inkundla kuzakuba luhlelo lwabo kuminyaka elandelayo. UNkolomi uthe akube ngumlandu wemuli yeHighlanders yonke.
“Siyakwamukela ukuqondiswa yikhansili ukuthi sicele umhlabathi. Njengoba iHighlanders ithakazelele iminyaka engamatshumi ayisitshiya galolunye, kubalulekile ukuthi ukuthola umhlabathi wokwakha inkundla kube luhlelo lwethu kuminyaka elandelayo sesibanga ikhulu leminyaka iHighlanders yasungulwa.”
Eqinisa amazwi akhe okusekela iHighlanders, uMoyo uthe: “Njengekhansili yedolobho lakoBulawayo sitshisekela ukuphakamisa ezemidlalo njalo sifuna ukubona iHighlanders iphumelela.
Ukwakhiwa kwenkundla kubonakala kuyindlela ezancedisa ukuthi iHighlanders ingalahlekelwa yimali nxa idinga inkundla zokudlalela lokulolonga.
Kuze kube lakhathesi, iHighlanders yilo lodwa iqembu elizimele lodwa kuleli elilamawofisi, indlu yabadlali kanye lendawo yokubuthana kwabalandeli labathandi bayo.
“Angeke sithi kuloBulawayo kungela iqembu leHighlanders. Idolobho leqembu leli kuyinto inye ngoba yona iBosso iyinsika yomuzi wakoBulawayo.”
Kusenjalo, ngomnyaka ozayo kumhlangano wabalandeli boqobo beHighlanders, kubikwa kuzahlafunwa indaba yomhlabathi wenkundla kanye lokuthegiswa kwama- shares eqembu. Kube yindaba esegudwini ukuthi iHighlanders kumele ithengisele labo abalemali ukwenzela ukuthi iqembu lebhola leli libe lengqubekela phambili kunhlelo zayo kanye lokubhadala izikwelede.
Umsekeli omkhulu weqembu uTshinga Dube ngomunye walabo abavumelana lalokhu. Ukuthegiswa kweBosso lokhu kubizwa ngokuthi yikwabelana ama-shares okubamba intambo kwezikaMagebhula.
“Khathesi sikumnyaka ka2016 ngakho akumelanga sicabange sengathi siku1926 ngesikhathi iqembu lisungulwa.
Inguqu yakulezinsuku isikhokhelwa njengebhizimusi. Nxa sifuna ukuyaphambili ngibona kulicebo elihle ukuthi kukhangelisiswe udaba lokwenza iHighlanders ibe-commercial. Yikho phela okwenziwa ngamanye amaqembu umhlaba wonke. “Abanye bethu abangamalunga bayesaba kodwa lo owazi ukuthi ibhizimusi lenguqu lihlelwe njani, uyazi ukuthi indlela eyiyo yikuthi iHighlanders ibeliqembu elilibhizimusi,” kutsho uDube, ilunga elilesandla esiphayo kuBosso.
