uMthunywa
YiNtatheli kaMthunywa
IKHABHINETHI ngoLwesibili ithe izikolo zizavulwa ngezigaba ezintathu okuzenza abafundi bonke babe sebesemakilasini ngenyanga kaLwezi.
Abafundi ababhala imihloliso yeZimbabwe School Examination Council (Zimsec) abagoqela oGiredi 7, abe-Ordinary Level leAdvanced Level, bavula izikolo ngoMvulo kuviki ezayo.
Ezinye izikolo ezilabantwana ababhala imihloliso yeCambridge zivulwe mhlaka 14 Mpandula njalo akukabi lombiko wokuhlaselwa kwabantwana yiCovid-19.
Ebikela intathelizindaba ngemva komhlangano lo, uMphathintambo obona ngokukhitshwa kwembiko uMonica Mutsvangwa uthe ugatsha olubona ngezeMfundo yaphansi laphezulu solulungele ukuvulwa kwezikolo ngezigaba ngaphansi kwesimo esikiso eseCovid-19.
UMutsvangwa uthe uHulumende uzanika izikolo impahla yokuvikela ukumemetheka komkhuhlane lo, imithi yokubulala amagcikwane yezandla njalo kuzakuba lequla elizahamba lihlola ukuze kube lesiqiniseko sokuba kuphephile ezikolo.
“Ngenxa yokulungela ukusebenza kohlangothi lwezemfundo, izikolo zizavulwa ngezigaba ezehlukeneyo. Isigaba sokuqala ngesalabo abazahlalela imihloliso yabo kaGrade 7, Form 4 loForm 6. Isigaba sesibili sizavula mhlaka 26 Mfumfu 2020, laba kuzabe kungo Grade 6, Form 3 kanye laboForm 5. Isigaba sokucina, sesithathu sizavula mhlaka 9 Lwezi njalo bonke abafundi abasezikolo bazabe sebebuyela esikolo kusukela kuECD,” kutsho uMphathintambo uMutsvangwa.
Kusenjalo, uGatsha lwezemfundo yaphansi leyaphezulu luhamba luvakatshela izabelo zonke zelizwe ngenhloso yokuhlola ukulungela ukuvulwa kwezikolo mhlaka 28 Mpandula.
Njengoba sekusele amalanga ambalwa, izikolo zemfundo yaphansi leyaphezulu zenza amalungiselelo okuthi zifinyelele zonke izimiso zenhlanganiso yeWorld Health Organisation kanye logatsha lwezempilakahle kanye lokondliwa kuhle kwabantwana okuyimithetho yokuvikela umkhuhlane we-coronavirus.
Ngokutsho kweMinistry of Primary and Secondary Education Mandatory Standard Operating Procedures (SOP) eyakhelwe ukuqondisa izikolo ekulungiseleleni ukuvula — ababalisi kanye labafundi kumele bazimisele ukwamukela indlela entsha yokwenza izinto bakhohlwe ngokuxhawulana, ukwangana kanye lokusebenzisa amatafula kwabafundi bebanengi.
Isikhathi sekhefu lokudla kumele sabelwe abafundi abalutshwana ngesikhathi ukuze bangabuthani kukanti ezemidlalo lazo zimisiwe.
Kudala umbalisi kumbe umfundi ongezwa kuhle emzimbeni wayelakho ukubuya esikolo kodwa khathesi lokhu akusoze kuvunyelwe nanko phela ugatsha lwezemfundo solubeke umthetho wokuthi bonke abagulayo bazihlalele emakhaya baze basile.
I-Covid-19 yaziwa ngokuba yingozi ikakhulu kulabo abalemikhuhlane ecatshileyo, kungakho-ke izikolo kuzamele zigcine izincwadi zababalisi labafundi abalemikhuhlane le kodwa zinanzelele kungabi lobandlululo ekwenzeni lokhu.
Abafundi kumele babeyi 35 kuphela ekilasini eyodwa njalo ababalisi kanye labafundi kuzamele baziqhelelanise okwemitha elilodwa lapho besekilasini kumbe egumeni lesikolo nje.
Engxoxweni ngoMvulo kuyonale iviki, uMqondisi wezokuhanjiswa kwembiko kugatsha lwezemfundo yaphansi leyaphezulu uMnumzana Taungana Ndoro uthe amaqula asuka ehofisini enkulu yezemfundo ahamba ehlola osokwenziwe yizikolo ukuze kulungiselelwe ukuvulwa kwezikolo ngeviki ezayo.
“Kuliqiniso ukuthi sihamba sihlola ukuthi izikolo sezikuliphi ibanga kumalungiselelo azo okuvula ngeviki ezayo. Kulamaqula ahamba esenza lumsebenzi kuzabelo zonke zelizwe,” utsho njalo.
UMnu Ndoro uthe ugatsha lwezemfundo lulethemba lokuthi amalungiselelo ezikolo ezinengi asekubanga eliphezulu nanko phela imihloliso kaNhlangula layo yaqhutshwa kuhle lasezikolo ezisemaphandleni.
Izikolo zavalwa ngoMbimbitho njalo bezilokhe zingakavulwa njengoba uHulumende ubethatha amanyathelo okuvikela ukumemetheka komkhuhlane we-Covid-19.
Imihloliso ye-Zimsec izaqala mhlaka 1 Mpalakazi.
