uMthunywa
Ethel Ncube
ABAZALI abalabantwana abafunda esikolo seZikhululeni, eNyamandlovu bakhala ngomphathisikolo wabo okucatshangelwa ukuba ubabikele ukuthi abantwababo ngeke bapase ngenxa yobubi besikolo sabo.
Kucatshangelwa ukuba umphathi lo wathi esolwa ngokufeyila kwabantwana ngabazali emhlanganweni wesikolo owaba khona kuyonale ithemu wababikela ukuthi ngeke abantwababo baphumelele ngoba isikolo sibi.
Ekhuluma lentatheli omunye umzali owayekhona emhlanganweni lo, uveze ukudana ngenkulumo kamphathi lo.
“Ngithukuthele kakhulu ngilapha ngoba umphathisikolo lo ubulala ikusasa labantwabethu. Sikhangelele amadokotela, omongikazi lababalisi kibo kodwa imfundo yakhona abayitholi kuhle ngoba laye umphathi kalandaba lakho, uthi lokhu kubangelwa yibubi besikolo.
“Sithe silomhlangano wabazali lababalisi sifuna ukubonisana ukuze sisebenze ndawonye abantwabethu bapase impendulo esayitholayo ayisiphathanga kuhle njengabazali. Umphathi kazange aphumputhe wathi ‘isikolo sibi, kungeke kupaswe’ lokhu kwasephula umoya,” kubika umzali lo ongathandanga ukuqanjwa esesabela umntanakhe.
Uqhubekele phambili echaza ukuba kungcono kutshintshwe ababalisi kulesisikolo ukuze kube lentuthuko kwezemfundo.
“Sicela abezemfundo basincedise umphathisikolo lo asuke esikolo sethu ngoba sibona angathi ukufeyila kwabantwabethu kubangelwa yikunganaki kukamphathi. Umntwana uyahamba amalanga amahlanu kodwa ebhukwini uyabe ebhale kanye nje kuphela.
“Umphathi lo wenza umathanda, ucabanga ukuthi asikwazi okumele sikwenze. Asimzondi kodwa ubulala imfundo, liqiniso elikhona esingalimela futhi ngoba wasitshela sikhangelene labazali ababekhona,” kubika umzali lo.
UMthunywa uphinde waxhumana lomunye umzali owesabe ukuveza igama lakhe ngoba esesabela ukuba ulomntwana ofunda kulesosikolo oziveze ngokuthi nguMaMoyo.
“Kulani ukuthi sincedisane kufundwe kulokuthi sithukwe ngalindlela? Thina kasiyiboni lemizamo ayenzayo njengomphathi ukuthi isikolo sibe sihle. Kungakhangelwa eminyakeni edluleyo emihlanu ukuthi inani labantwana elapasayo linganani abezemfundo bazamangala.
“Okunye okusihluphayo umphathisikolo lo uhlala engekho, ngeviki ubakhona kanye kuphela. Pho athuthukise njani isikolo engahlali khona,” kubika uNkszn Moyo.
Ekhuluma lentatheli uMqondisi wezemfundo esabelweni seMatabeleland North uMnumzana Jabulani Mpofu uchaze ukuba akuqondanga ukuthethisa abazali.
“Nxa kuliqiniso ukuthi abazali wabathuka akuqondanga njalo ngiyaqala ukuzwa ngodaba lolu. Ngizachwayisisa ngalo ngizwisise ukuthi kuhamba njani, ngizalazisa,” kuphetha uMnu Mpofu.
