uMthunywa
Yintatheli kaMthunywa
ABADLALI be-pool izwe lonke bazadibana kulimpelaviki eRaylton Sports Club koBulawayo kubangwa umvuzo weCarling Black Label obiza inkulungwane zamadola.
Umncintiswano lo uhlanganisa intshantshu eziphuma kumaligi e-pool kuzabelo zonke zelizwe njalo uhlawulelwa yinkampani yeDelta Beverages.
Lonyaka imivuzo ikhuphukile kukanti lenani labadlali lengezelelwe. IDelta Beverages ithe lokhu ikwenze ngenhloso yokuthi ikhuthaze abadlali ukuthi baqhubeke bencintisa kulumdlalo osukhule okumangalisayo kuleli.
Umvuzo omkhulu ngowe-$1 000 njalo uza lezipho ezithile ezibalisa impahla yokudlala i-pool.
Umongameli weZimbabwe Pool Association uTrust Chifadza ubikele uMthunywa eseHarare ukuba ukudibana kwentshantshu ze-pool koBulawayo kuveza ukuthi inkampani yeDelta Beverages isibonile ukuthi umdlalo we-pool udonsa abantu abanengi.
UChifadza ucele ukuthi bonke abazaphatheka kulumncintiswano bazibambe, batshengisele inhlonipho.
“Sikhangelele ukuthi sinxuse amathimu labadlali bonke abazintshantshu kuzabelo. Ukuza kwenkezo le koBulawayo kubaluleke kakhulu ngoba akukaze kwenzakale.
“Abadlali bonke abanxuswe kumidlalo yokucina eyeCarling Black Label sibacela ukuthi badlale njengabantu abakhulileyo abazi ukuthi umdlalo onjengalo ulosekelo lwaphezulu. Asifuni budlwangudlwangu ngoba yikho okuxotsha imali emdlalweni wethu.”
Uthe ulokuthokoza ngokuzimisela kweDelta Beverages kodwa abasoze badele kumizamo yabo yokudinga amanye amankampani alakho ukusekela umdlalo we-pool kweminye imincintiswano phakathi komnyaka.
Kusenjalo, uChifadza uthe iZimbabwe Pool Association izadibanisa amaqembu ayo emhlanganweni lapho azakhuthazwa ukuthi ancedise abasakhulayo ukungena kulumdlalo.
UChifadza uveze ukuthi sebekhulumisane leSport and Recreation Commission ukuthi inhlanganiso yabo iphitshekela ukufundisa okhekhe umdlalo lo.
Kubikwa lokhu kungenye yemisebenzi yalinhlanganiso yokusebenzelana lozulu kwezengqubekela phambili yomdlalo izwe lonke.
