uMthunywa
YiNtatheli kaMthunywa
ABASALUGXOBI esikolo abanye ababalisi kunye labafundi ngenxa yezigigaba ezenzakala eSivondo Primary School eNkayi nanko phela kubikwa ababalisi bakulesisikolo bahlaselwa kokuphela yimikhuhlane engacaciyo osokubangele ukuthi omunye umbalisi afe ngemva kokuwa bekumbuthano wekuseni.
Ngaphandle kwalokhu uMthunywa uzwe ukuba kulabanye ababili abalalisiweyo esibhedlela ngemva kokuqaleka.
Kubikwa uMnumzana Takunda Murefu obengumbalisi kulesi sikolo uwe esikolo ngesikhathi kuhlatshelwa iNational Anthem andubana abhubhe ngemva kwensuku ezimbili ekhala ngeqolo.
Izakhamizi zakule indawo zikhathazekile ngeziga lezi nanko phela kubikwa sekusele ababalisi ababili nje kuphela esikolo lesi kulandela ukuhlaselwa kwabo yimikhuhlane engaqedakaliyo. Ngenxa yezigigaba lezi ikhomithi yesikolo ibize umhlangano ngoLwesithathu kuyonale iviki ukuze kudingidwe abantu abangazohlahlula isikolo kukhitshwe ondofa asebefuna ukuqeda ababalisi. Esinye isakhamuzi sakule indawo uMnumzana Edmore Ndlovu ubikele uMthunywa ukuthi okwenzakala esikolo lesi akukaze kwenzakale.
“Abantwabethu kanye lababalisi abasavikelekanga esikolo lesi ngenxa yezigigaba ezenzakalayo. Ababalisi abakaze bagule njengalokhu esikubona lonyaka lanxa isikolo lesi sesisidala.
“Sicabangela ukuthi lokhu kungabe kusenziwa mhlawumbe ngomunye umbalisi othumela izinto ukuthi zitshaye ababalisi. Esikwesabelayo yikuthi abantwabethu labo basengozini okokuthi ezinye izinto zenzakala bekhangele okungabaphazamisa ezifundweni zabo,” nguMnu Ndlovu lo.
UMthunywa ukhulume njalo lomunye umzali uMnumzana Methuseli Sibanda othe kungenzeka kube yizinto ezatshiywa esikolo ezitshaya ababalisi baqaleke.
“Indlela ababalisi asebeqaleka ngayo iyasethusa nanko phela sebebathathu besiwa ngalindlela. Phezu kwalokhu lumbalisi oqalekileyo uhle agule ngendlela engazwisisekiyo okwenza sonke sinje kusikhathaze lokhu.
“Ngaphandle kwababalisi kulomntwana olenyanga ezilitshumi laye owaqalekayo, sikhuluma nje ulalisiwe esibhedlela ngemva kokuba yena lonina ongumbalisi kulesisikolo bebone ondofa,” nguMnu Sibanda lo.
Omunye umbalisi okhulume loMthunywa ongathandanga ukuqanjwa ngebizo uthe ababalisi bakulesi sikolo sebabaleka ngoba umphathisikolo kabaphathisi ngalutho nxa bekhalaza ngalokhu okwenzakala esikolo.
“Umphathi kukhanya ukwelakhe icele, kasiphathisi ngitsho. Nxa sisithi kudingwe otsikamutanda yena uthi sikhuleke kuzaphela. Zikhona izakhamizi ezigangileyo ezisithumela izinto lezi ngoba ebusuku kasilali, silala sisizwa abantu abakhulumayo lezinto ezigijimayo ephahleni,’’ kutsho umbalisi lo.
“Okunye okusikhathazayo yikuthi uMurefu obhubhileyo ubelaliswe esibhedlela seMpilo kodwa umphathi wamtshayela ucingo esithi usehlale isikhathi eside engekho esikolo njalo kumele aphenduke okuyikho okuze kwabangela ukufa kwakhe ngoba ubelokhu engakaqini.
“Ngemva kwensuku ezimbili kubhubhe uMurefu omunye njalo umbalisi wesilisa waqaleka njalo laye lokhu ekhala ngeqolo,” kutsho lumbalisi.
Omunye njalo umbalisi ongathandanga ukuqanjwa ngebizo wengezelele ngokuthi ngoMvulo kuyonale iviki omunye umbalisi wesifazane losana lwakhe bahlaselwa ngumkhuhlane ofanayo njalo balalisiwe esibhedlela.
Imizamo yokukhuluma lomkhulu kwezemfundo esabelweni seMatabeleland North yehlule.
