uMthunywa
Charles Dube
Ngaphambilini sitshiye uMaNgwenya unina kaSilobile ekhalela abaphansi ukuthi aluba bayaqumbisa uSilobile.
Ngokuqumbisa lokhu wayesitsho ukuthi aluba bayavumela azithwale kodwa izandla zakhe zaqhuqha nxa enakana ukuphipha usana olwadojwa ngumuntu owabaleka ekhaya. UMbengo laye wala ngaphakathi kwakhe ukuthi uchago lwenkomo zakhe lunganathwa yinto engelasibongo. Wayengaba lesibongo njani umntakaSilobile khona kusobala ukuthi wayengela jaha eliqondileyo.
Bathi besabindana lobunzima obungaka uMaNgwenya loMbengo, uKhokho wehla njalo ethi endulo abantwana babebesaba abazali babo, ukuze balungelwe. Wabuza wathi, “Umzali womuntu kasumlimu wakhe kanti!” Lapha sizwa uKhokho ekhuluma inkulumo ehambelana lamazwi atholakala kuncwadi engcwele, iBhayibhili athi,
“Hlonipha uyihlo lonyoko ukuze insuku zakho zande emhlabeni.”
Kwakukuhle koMbengo abantwana balapha ekhaya bekhona bobabili izikolo zivaliwe. UMaNgwenya wayesiba leqhono elikhulu. Imvukuzane ingakembi imilindi koMbengo, wayesiba ngamakha uMaNgwenya nxa uSilobile ehlezi lomnawakhe uBantwini bephikisana ngabakufundileyo ezikolo zabo. Lokhu kutsho ukuthi wayejabula kakhulu uMaNgwenya. Babexoxa bephikisana langokwedlulana kwamatitsha abo oSilobile loBantwini.
UKhokho yena kakuzwisisanga ukukhuluma okutsha lokhu, kodwa kwaze kwangena nxa uBantwini ebatshela ngokwakhe kwatshunyayelwa ngumfundisi wabo ngolunye usuku. Kuthiwa wathi, “Ngiyalilaya, bafana. Imfundo iyathuthaza! Ikhangelisa umuntu phansi, imenza esabe umhlaba.” USilobile ngokungajuli kwengqondo yakhe wabuza kuBantwini ukuthi yikho ababekukholisa eNyathi ezihlekela nje. Kodwa uMaNgwenya akwaze kwamhlekisa. UKhokho laye wavuka wamuthi nhlo uBantwini ngelihlo.
UBantwini wakutshaya indiva lokho wabatshela ukuthi umfundisi wabo wake wabatshela ngomuntu ofundileyo.
Kuthiwa umfundisi lowo wathi umuntu unjengethanga. Wayaphambili ethi ithanga ligobhozisa amathe nxa umuntu elikhangele lisentangeni. Nxa liphekeke kuhle limnandi. Kodwa lingafuba ekuphekeni liba yikudla kwengulube. Uthi ezinye ingulube lazo ziya zilinuke kuphela, zingalidli. Ijula indaba kaBantwini kungqondo zabantu ababelapho kwaphela ukuhleka. UKhokho wangathi usewomile njengogodo.
Wabona uBantwini ukuthi ukukhuluma kukamfundisi wabo kuyabangena onina. Wayenakana ukuthi bazakukuhleka; bathi yikuhlanya. Waqhubeka uBantwini ethi umfundisi wabo wathi lejodo linjalo. Lingehluleka ukufika ebujodweni liba ngumkiliwane lisale emasimini ngoba lenkomo kazilidli. Bawubona bonke umkiliwane.
Babona sibili lokuthi lengulube ziwudlela ukulamba. Esesiya emaphethelweni endaba yakhe uBantwini uchaza ukuthi umfundisi wabo wathi lomuntu unjalo.
Wathi umuntu ebunyameni bakhe muhle. Angafundiswa kuhle aphekeke kuhle imngene kuhle imfundo, kuba kuhle kakhulu. Ukhotheme. Uwunyathela ewesaba umhlaba. Kodwa bangamkhutha ekumphekeni, uyafuba; abe njengethanga elifubileyo, lanjengomkiliwane. Bayamenyanya abantu, umenyanye umhlaba. Wayiqeda kanjalo imfundiso yomfundisi wabo uBantwini. Bathula bonke. UMaNgwenya wabakhangela abantwabakhe wafisa ukuthi bangabi ngumkiliwane.
UKhokho yena waphendukela kuMaNgwenya wathi ngumfundisi sibili. Wayaphambili wabuza ukuthi ngumfokabani umfundisi wabo Bantwini kodwa wezwa ukuba wayevela phetsheya. Lingakabaswa ichithamuzi lapha koMbengo uSilobile laye wayazisa inkulumo yomfundisi waboBantwini. Wanakana ngeyakhe imfundo.
Waziyenga wathi yena waphekeka, akasiwo umkiliwane. Uyabaguqela abadala. UMaNgwenya laye wakukholwa ukuthi abakhe abantwana kabasiyo imikiliwane. Wazibula langokufunda kwabo. Wabaguqela njalo abaphansi, wabacela ukuthi bathathise uQhikiza unyawo lukaSilobile. Sizoyicela ivuthiwe.
