uMthunywa
Charles Dube
Lamhlanje sihlangana loNgenzile loSilobile bephakakathi kohambo lokuya edolobheni lakoBulawayo. Usenelisile ukumgudlula wamdudula wamtshiyisa ububalisi uSilobile uNgenzile. Bahamba nje uNgenzile uyabona ukuthi umngane wakhe kakangeni atshone phakathi kobubi yikho nje uNgenzile uqhubeka elokhu emdonsela kunziki yobubi. Njengabantu abasuka ngokubaleka oNgenzile loSilobile ibhasi kabayigadeli esilindwenii esijwayelekileyo seHadlana okuthiwa kuseSidulini.
Bahamba umango omude baze bedlule iKhezi bayagadela ngaphetsheya komfula uMbabule. Besaba ukugadela eSidulini becabanga ukuthi abakwabo bakaSilobile bengacabanga ukubalandela bahle bebaphuthume bengakagadi ibhasi. Ngalokho bavuka kusasele batshaya utshani ilanga layabaphumela sebekhatshana. Lanxa behamba nje uNgenzile uthukuthele yikho ebhoka ethi kulabantu abangalunganga emhlabeni, abalomhawu.
Wayaphambili uNgenzile ethi labobantu abalomhawu bathanda ukona amabizo abanye. USilobile uveza sibili ukuthi ububi abukamngeni kakhulu ngoba wethuka esethe, “Uthi umuntu angangena izinto zabantu.” Ngokutsho njalo wabona uNgenzile ukuthi uchago lobuntu uSilobile alumunyayo kunina alukabi ngumlaza. Lokhu kutsho ukuthi uNgenzile wabona ukuthi uSilobile wayeseselobuntu, ububi babungakamgabhi. Ngethutshana lenhlanhla hlezi wayengaphenduka ebubini lobo ayebufundiswa nguNgenzile.
UNgenzile ebona ukuthi uSilobile kakalihlubi ikhasi lomuntu wathi kuhle engamtshiyi edolobheni engakamenzi umantswana okutsho ukuthi engakamqinisi ebubini. Wathi kahle ambonise ukuthi lalokhuya abakwenzayo kakukubi ngoba babegolonjiwe. Yikuphi lokho ababekwenzile? USilobile uyabuza ethi, “Wayethunywe ngubani?”
Ngalowombuzo wazi uNgenzile ukuthi uSilobile kakalihlubi ikhasi lobuntu. Kodwa uNgenzile wathi kangaze amehlula nanku wayesephumile ekhaya. Kuba lombuzo othi, “Nguphi umlobokazi owake waphenduka endleleni?
Athi kwenzenjani lapha abeqonde khona?
“Bathini abantu kuye? Kakungcono ukuyabuya ekwendeni kulokuphenduka endleleni?” UNgenzile wabuza ukuthi umuntu engangena njani indaba enganxuswanga uSilobile yena wagcizelela ngokuthi ezakhe ezigqibela? Esizwa lokho kuthiwa uNgenzile wangena masinyane ngaphakathi kukaSilobile wahaqahaqaza bonke ubuntwana obabusele. Wahlanyela umfaba enhliziyweni kaSilobile uNgenzile, lokhu kusitsho ukuthi wahlanyela ububi kuSilobile. Uqhamuka ethi, “Utshona engiphethe.” Isimanga yikuthi kamqambi lowo muntu uNgenzile kodwa utshengisa inzondo alayo ngalowo muntu.
Lowo muntu uNgenzile athi utshona emphethe esitsho ukuthi utshona ekhuluma ngaye uthi nguye ofundisa uSilobile ububi. USilobile laye osethwasa ebubini uyabuza ukuthi umfundisani uNgenzile? Kazaphendula uNgenzile ethi uSilobile kaziphendulele lowombuzo. Yena uSilobile waphendula ngelithi, “Uyakuhlolela.”
UNgenzile esethe lokho kubangwa ngumhawu uSilobile wathi uzatshipha-ke esongela uMkhahlela. Sekuvela sobala ukuthi uMkhahlela wahlaselwa ngabantu ethunywe nguNgenzile loSilobile bembangisa ukuthi wayesazi ububi babo njalo ebuchaya ebantwini nxa besematshwaleni.
UNgenzile esebuze uSilobile ukuthi kambe wayengamsusa ekhaya engathandi yena uphendula ethi kasengumntwana yena, kasalelwa. Amthabisa lawo mazwi uNgenzile, njalo wawakholwa ngoba nangu uSilobile wayesukile abakwabo bengathandi. Sizakuma lapha lamhlanje kodwa ungaze walukhutha udaba lolu kuviki elizayo uwuzwisise umfaba owahlanyelwa nguNgenzile enhliziyweni kaSilobile.
