uMthunywa
Charles Dube
USilobile usewuhotshile umoya kaNgenzile, usethathekile okokuthi uselalela yena kuphela. Useyikhongozele yonke imfundiso kaNgenzile yaba luluju kuye. Le imfundiso kaNgenzile yageleza kungosi zonke zomzimba kaSilobile.
Waguquka kusimo ayesaziwa ngaso uSilobile. Inkophe zakhe zaqaphela phezulu, wakukhwabitha ukuya edolobheni atshiye intuthu zekhaya le.
Wafisa ukuthi izikolo zithi zivulwa abe esehambile. Wathi kayikumtshela umfundisi, ngoba ngengxenye angahle athande ukumvalela. Unjalo uSathane nxa esengenile emuntwini uyamphambula nxa ethi ufuna into enhle. Aluba uSilobile wayemtshelile umfundisi hlezi wayezamlalela ngamandla kaNkulunkulu asuse umoya wokuya edolobheni lapho ayengazi muntu khona.
Yena uSilobile wathi uzanyenya. Lokhu kuveza sobala ukuthi wayengahambi ngokuhle ngoba ukunyenya kutsho ukuthi wayesenza into engabusisekanga ephambene lomthetho wabazali bakhe. Besehlukana uNgenzile wayebethele umtshoko kuSilobile emtshela lokuthi abafana baBulawayo abanjengabalapho kibo. Iphutha alenzayo uNgenzile yikuthi kakuchazanga ukuthi behluke ngani kodwa wathi uSilobile wayezazibonela.
Ngabe wambonibonisa ukuthi kabafanani ngani kumbe ngabe amaphaphu akhe ayekela ukubhulana. Lenhliziyo yakhe kumbe ngabe yekela ukudutshuza ize iphose imvavule imbambo. Wakhangela ekhaya uSilobile. Wasindana lawo umango enjengesiduli sona esingezwayo. Yena ngokwakhe uSilobile wayephephuka lomoya. Umlobi usilethela enye indlela yokuloba lapho umlingiswa ekhuluma yedwa ekhupha konke okusemoyeni wakhe kungathi ukhuluma lomunye umlingiswa.
Kunjalo-ke ngoSilobile othi lanxa esehlukene loNgenzile okwenyama kodwa akhulume laye ongabonwayo ekhala ngokuthi, “Ungenzile, Ngenzile.” Nxa ebuza lowo Ngenzile ongabonwayo ukuthi umenze ngani, uSilobile uthi umenze ngokumtshela ngobuhle ayengasoze abubona. Wahleka uNgenzile olelizwi elingabonwayo ebuza ethi, “Usufuna ukuhamba?” Wavuma uSilobile ethi, “Lamhlanje.” UNgenzile wathi kuSilobile, “Usuyintwala yami”, behleka bobabili.
Wayengakufihli uNgenzile ukuthi uSilobile njengoba esevumile ukulandela intando yakhe useyahlala enamathele kuye njengentwala, abaseyikwehlukana. USilobile ubethi ngomoya wakhe antininize aye edolobheni ababone labo bafana, izigqoko lezo azakuzigugiselwa ngumesisi lowo azakumsebenzela. Wayekeqe aye ngekhaya kwabo, ambone unina. Athi enhliziyweni yakhe, nxa bedinga ukumvimbela bazavuka bebona ngengubo ezingendlulwanga ngolunye usuku. Wayezimisele ukubaleka aye edolobheni.
Unjalo umuntu nxa esekhohliswe yinhliziyo yakhe ngalokho angakuboniyo. Usezimisele ukuduha uSilobile, akusekho okuhle lapha ekhaya kwabo. Konke lokhu kusemkhumbulweni wakhe. Imikhumbulo yakhe isahlanya kanjalo, ephephetheka lamazwe angathi ngumuntu oxotshiweyo, wabona esedilikela ngekhaya. Ungena ngekhaya nje ubuntu usebutshiye kuNgenzile. Wakususa kuye lokubobotheka kwakhe. Uhleko lolu obeluze lwethuse imvundla, ivuke isikhathi sayo singakafiki, yethuse lenyoni zize zibaleke zisithi kumbe kwethuswa zona, walutshiya kuNgenzile, uSilobile.
Wayengasahlekeleli lapha ekhaya esengobophe ubuso.
