uMthunywa
Charles Dube
UNGENZILE lo esifunda ngaye kulolugwalo yintombazana exhwalileyo okwamagama. Abazali abanengi ngesesikuzwile kabafuni njalo kabafisi ukuthi abonakale nje elabantwababo. Ukumuthi tshazi nje elomntwana womunye umuntu kuletha ukwethuka okukhulu ngoba kulokwesabela ukuthi uzamfundisa izinto ezingalunganga amsuse kwabo ahambe laye ezinkomponi ezinjengeMbijana.
Yikho nje kuviki ephelileyo sizwe abantu sebezwile ukuthi uNgenzile ubonakale emzini kaMbengo Ncube bamzwela isihawu besithi umkhuhlane usungenile endlini kwakhe. Bathi nxa uMbengo engawanxibanga amasango uNgenzile uzafohla laye uSilobile. Babetsho khona ukuthi uNgenzile uzabalekisa uSilobile ekhaya. UMaNsema waze wathi uselobile-ke uMaNgwenya etsho ukuba usechithekile ngoba umntanakhe uzabalekiswa nguNgenzile bahambe lelizwe into eyayilihlazo.
Bethukile abantu beHadlana ngesifo esesibangenele lapho abantwana bengasalali emakhaya sebelala begida ubusuku bonke. Kunengi osekusenziwa emnyameni okwethusa lamadoda eHadlana hatshi isifazana kuphela.
UMkhahlela utshela uNdlovu ukuthi laye uyakwenyanya lokhu okwenzakala ebusuku. Uyaphambili uMkhahlela ethi abantwana sebegxumukele esizibeni esibi. Lokhu kutshayisa umuntu omdala uNdlovu uvalo.
Uyagcizelela uMkhahlela ukuthi abantwana sebegxumukele esizibeni esibi esilomlindi wengwenya. Ngala amazwi uMkhahlela uthi abantwana sebewele phakathi kobubi okunzima ukuphuma kulo ngoba ingwenya zilakho ukuthi zibabambe zibadle. Sekufike isiphepho sobubi osekulokwesabela ukuthi sizabachitha abantwana abanengi abazali babo basale bemangele. Isiziba leso kuthiwa simnyama njalo. UNdlovu uyasibona leso siziba esimnyama kodwa ingwenya yakhona kayiboni.
Isiziba esimnyama lesi usibona emcabangweni uNdlovu yikho nje ethalaza umkhonto angayihlaba ngayo ingwenya leyo, ukuze bantsheze babuye asebegxumukele kulesosiziba. Ngomcabango wakhe uNdlovu ubona angathi angabahlenga labo asebethethwe ludumo lomoya omubi lo osutshengisa ukuthi uzasithunqisa isizwe silobe. Kubi lokhu osekusenziwa yintsha ngoba uMkhahlela utshela uNdlovu ukuthi ingamhlanzisa imisebenzi.
Kuyamdanisa uNdlovu aze athi bangcono abakhula bakhe asebafayo laye wafisa ukubalandela ngoba bafa bengabonanga ukonakala komhlaba lokhu osekukhona. Ukubeka ngalamazwi: “Benza baziqamela ezabo abanakwethu.” Uyaphikelela uMkhahlela ethi imisebenzi yakhona ngeyebusuku. Nanzelela ukuthi abantu ngesikhathi lesi ababuthandi ubusuku kanye lezinto ezenziwa emnyameni. Kuthiwa imizi yabatsha laba yenziwa ebusuku, emnyameni amehlo engasakuboni okwenziwa yinyama. Kugida wonke umuntu kulowo mnyama ngoba wonke umuntu efuna ukubonakala.
EMbijana leyo esibuye lobubi uMkhahlela utshela indlovu ukuthi kulemidlalo yokudla; lapha kuthengiselwana ukudla kubhejwe kuthiwe, “Ngamasenti ami amahlanu ngithi uSihlephu kangithengele ukudla kwamasenti alitshumi.” Lowo obhejelweyo nxa elawo lawo masenti alitshumi akuthenge lokho kudla. Nxa engelawo azenze umuntu owalayo; zihlekele emakhwapheni intombi. Kuthi nxa elenhliziyo encinyane aphume esenxapha. Ngezinye insuku kuphunywa sekuvikwa induku lamatshe.
