uMthunywa
Nkosilathi Sibanda
KULOMDLALO omkhulu ngeSonto kudibana inkunzi zomdlalo wenguqu iHighlanders leDynamos ngelanga isizwe sithakazelela uzibuse.
Isizwe zeZimbabwe sifikisa iminyaka engamatshumi amane lanye lizibusa mhlaka 18.
Ubukhulu balumdlalo abusoke bufikise izinga elijwayelwe ngababukeli nanko lonyaka abasekeli bazabukela kumabonakude. Loba kunjalo, umdlalo lo ubalulekile ngokuthi ngowakuqala kusukela ngoNhlolanja nyakenye.
Imidlalo ibimisiwe kulandelwa izinqumo zikaHulumende zokwenqabela ukumemetheka kwegcikwane leCovid-19.
Sizaphela isizungu ebesihlasele abathandi bebhola likanobhutshuzwayo kulandela ukuvalwa komdlalo abawuthanda kakhulu.
Kuzabonakala mhla walumdlalo ukuthi abadlali bakuliphi izinga lokulungiselela ukuqala kweligi mhlaka 15 kusiya ku-16 Nkwenkwezi. Amaqembu adlala kuPremier Soccer League avunyelwe ukubuyela enkundleni kumaviki amabili adluleyo.
Ukuza komdllao kazibuse kubeyisimanga kubaqeqetshi beDynamos leHighlanders ngoba akuzange kube lethuba lokulolonga.
Umqeqetshi weHighlanders uMandla Lulu Mpofu uthe ukuhlala emakhaya inyanga ezedlula itshumi kukhubaze abadlali okokuthi kuzabanzima kwabanye ukuqeda imzuzu eyi-90 enkundleni.
Kusukela ngeSonto, umqeqetshi ugijimise bonke abadlali bakhe ababalisa uRay Lunga, Andrew Mbeba, Bukhosi Sibanda, Nqobizitha Masuku, Mbongeni Ndlovu, Adrian Silla, Mthabisi Ncube Godfrey Makaruse, Charlton Siamalonga, Humphrey Ncube loCardwell Gavaza.
“Isikhathi esinikezwe amaqembu ukuthi alungiselele sincinyane. Abadlali yikhona bedinga ukuqina lokuxwayiswa ukuthi beyenzeni ngemva kokudonsa amalanga bengadlali,” kutsho uLulu.
Umqeqetshi lo othatha intambo ngemva kokusuka kukaDe Jongh, ubike ukuba kasoke acatshe ngokuthi abadlali abakaqini.
“Lokho angeke kubeyisizatho sokuthi sidliwe yiDynamos. Lo ngumdlalo onzima ofuna ukuzimisela.”
Kusenjalo, ubuciko bobuqeqetshi bukaLulu buzacwayisiswa ngabalandeli ngoba befuna ukubona ukuthi uzalibumba njani iqembu.
IBosso yafulathelwa nguMcClive Phiri owatshiya isikhala esandleni sokudlula emhlubulweni wangemuva. Kubikwa umqeqetshi uleqhinga lokuthi asebenzise abadlali abatsha.
NgoLwesibili umqeqetshi ubikele uMthunywa ukuthi usahlosisa isimo sabadlali abaze kuhlelo lokulolonga.
Kubadlali laba, umqeqetshi uphose amehlo kubabadlali ababbili uCrispen Ncube loToto Banda.
UNcube loBanda bavela kuBulawayo City.
“Sizahlolisisa ukuthi basiphatheleni abadlali laba anduba sibelethemba kubo.”
Kodwa abalandeli baleliqembu bazathembela kuWinston Mhango, okungathandabuzwayo ukuthi uzakuba yinsika yokunqoba.
UMhango, ekhuluma lentatheli ngoLwesibili uthe inhloso yakhe yikujabulisa abaqeqetshi .
“Ukudlala leDynamos kungumthwalo njalo kuyakhuthaza. Njengabadlali sizkwenza konke okusemandleni ethu ukuthi senelise ukunqoba,” kutsho lumdlali ongazange akufihle ukuthi kuzakuba lilanga lakhe ngeSonto.
Abanye abadlali abafisa ukuzodlalela ekaMatshobana babalisa owake wabangumdlali weBidvest uWellington Mangena oleminyaka engu 22 yokuzalwa.
