uMthunywa
Cornelius Luphahla
NGENXA yokuthanda ezifela emlonyeni kulendoda yelokitshini leCowdray Park edolobheni lakoBulawayo ebhuqe umkayo yamkhumula amazinyo imethesa icala lokupheka imboza lokutshisa inyama yenkukhu.
Impi le yenzakale ngoLwesihlanu kuviki ephelileyo lapho uMnumzana Malvin Moyo atshaye khona umkakhe uNkosazana Cleopatra Murimba wamkhumula amazinyo ethi upheke imboza njalo utshise lenyama yenkukhu.
UMthunywa ukhulumisane loMnumzana Rodwell Ndlovu oyisakhamuzi sakule indawo waveza ukuthi nguye owalamulela inina leli litshaywa ngumkalo.
“Ngezwa umkhosi uvelela komakhelwane ngagijima ngaya khona ngathola uMoyo etshaya umkakhe kabuhlungu ngenqindi seze wawela phansi. Ngasengimbamba ngamsusa phezulu komkakhe kwaba yikho ukusila kwakhe noma nje wayesekhumuke amazinyo amabili.
“Ngathi ngimbuza ukuthi ubangani lomkakhe wathi umphekele imboza njalo utshise lenyama yenkukhu ayithenge nzima,” kutsho uMnu Ndlovu.
UNkszn Cleopatra Murimba ebuzwa ngale indaba uvumile ukuthi yenzakala wathi kakwazi ukuthi umkakhe wayengenwe yini aze amtshaye ngaleyondlela.
“Kuliqiniso sibili ukuthi saxabana lomkami wangitshaya kabuhlungu kodwa kangikwazi ukuthi wayengenwe yini ngoba kakaze akwenze lokhu angenza khona. Ngokubona kwami sasingaxatshaniswa yikupheka kuphela kodwa kwakukhona okunye okwakumcaphulile.
“Noma nje sike saxabana kodwa sesiyilungisile indaba yethu sesihlezi ngokuthula lomkami,” kutsho uNkszn Murimba.
Ebuzwa ngale indaba uMnu Moyo uchaze ukuthi wayephandlwe ngumaphephetha yikho okwenza waxabana lomkakhe ngakho kabonanga lutho.
“Ngelanga ngixabana lomkami ngangidakwe kakhulu ngakho kangikwazi ukuthi kwahamba njani kodwa sesakhuluma ngamxolisa ngabuya ngayaxolisa ngakibo,” kuphetha uMnu Moyo.
