Listen Ndlovu
ABALIMI bakhuthazwa ukuba batshintshanise izilimo emasimini ukuze umhlabathi wabo uhlale uvundile.
Ekhuluma lentatheli uMnunzana Norman Ncube ongumlimi eFilabusi eSilalatshani uthe ukulima izilimo ezitshiyeneyo endaweni eyodwa kuyalondoloza ukuvunda komhlabathi.
“Umlimi engalima isilimo esisodwa endaweni yinye okwesikhathi eside isivuno sakhe ngokuya kwesikhathi siyehla ngoba ukudla okusetshenziswa yisilimo leso kuyabe sekuphelile isilimo sesingasakhuli kuhle.”
“Umlimi kumele atshintshanise izilimo zakhe endaweni alima kuyo ukuze insimu yakhe ihlale ilokudla,” kutsho uMnu Ncube.
“Ukutshintshanisa izilimo endaweni eyodwa kuyagcina ukuvunda komhlabathi kusiya ngokuthi yisilimo bani umlimi asilimileyo.
Kuqakathekile njalo ukuthi umlimi ananzelele ukuthi isilimo ngesilimo sisebenzisa ukudla bani emhlabathini ukuze abekwazi ukuthi nxa ekhipha lesi isilimo ufaka siphi,” kutsho uMnu Ncube.
Ubike njalo ukuba ukutshintshanisa izilimo kuvikela ukugugudeka komhlabathi.
“Ukutshintshanisa izilimo kuyanceda ukuvikela ugugudeka komhlabathi ngoba impande zezinye izilimo zinde ziyabamba umhlabathi ukuthi ungagugudeki ngesikhathi sezulu.”
UMnu Ncube uphethe ngokuthi ukutshintshanisa izilimo kwenza umlimi azitholele isivuno esihle minyaka yonke.