YiNtatheli kaMthunywa
HLANYELA ibilebile lakho lapho okulelanga elizwayo njalo okulenhlabathi evundileyo. Ibilebile lilakho ukubanjwa yimikhuhlane ethize ebangelwa ngamagcikwane. Ukuze uvikele inhlabathi ekuhlanganeni lamahlamvu ezihlahla zakho zebilebile sebenzisa i-drip irrigation njalo ungafafazi amanzi ngama-sprinklers.
Ungakahlanyeli inhlanyelo yakho, kulicebo elihle ukuthi uyifafaze ngomuthi wohlobo lwe-fungicide ofana le-thiram. Lokhu kuvikela ukuthi inhlanyelo yakho nxa ihluma iphazamiseke. Kusiya ngokutshisa komhlabathi wakho, ukuhluma kulakho ukwenzakala ngemva kwensuku ezinlutshwana kusiya kumaviki amathathu. Hlanyela isilimo sakho kubelesikhala esingange 40 centimetres phakathi laphakathi kwamagodi akho.
Isilimo lesi silakho ukuvunwa ngemva kwenyanga ezintathu. Ulakho ukugcina izihlahlakazana zakho zebilebile okweminyaka emihlanu yiloba nje isivuno sakho siyaqala ukwehla ngokuya kwesikhathi. Kulicebo elihle ukuthi uvikele izihlahlakazana zakho kungqwaqwane.
Imikhuhlane kanye lezibungwana ezijayelekileyo kulesi silimo igoqela i-bacterial wilt, fusarium wilt, powdery mildew, blossom end rot, aphids, American boll worm, cutworms kanye lama red spider mites. Sebenzisa indlela zemvelo zokuqeda lezindubo ungakafaki amakhemikhali.
Sebenzisa inhlanyelo ehlanzekileyo, amanzi ahlanzekileyo okuthelela ubususenza isiqinisekiso sokuthi akula fethilayiza ye-nitrogen efakwayo. Kumele uhlale ulezandla ezihlanzekileyo ikakhulu kulabo ababhema igwayi nxa uzabamba isilimo lesi, ungasitheleli kakhulu.
Kumele njalo ukhiphe izihlahlakazana ezingabe zilomkhuhlane uphinde ugezise amathuluzi owasebenzisa esivandeni sakho.
Nxa uvuna ibilebile elibabayo kuyadingakala ukuthi ugqoke amagilovusi ukuze ungangenwa libilebile emehlweni. Isivuno singaba ngangamakhilogilamu angu-100 kusiya kwangu-3 000 kuhekitha elilodwa kulabo abalimela ukuthengisa. Isilimo lesi silakho ukonyiswa sigcinwe ukuze sisetshenziswe kwelakusasa.