Ugwalo: Indlalifa ngubani, Umdlalo owalotshwa ngu N S Sigogo
Ophezulu Stinta
Ngeviki edluleyo, besiphezu kodaba lokuthi kanti vele umuntu ofika kusigaba sokuthi lizalibelethwe, kuyabe kuvele kuhambe njani.
Kube sobala-ke ukuthi uLuphondo wayengasondlifa yalapha ekhaya udaba obelufihlwa okwamagama ngesizatho sokuvala ihlazo phakathi komuzi.
Indaba ezifana lalezi zazingacubungulwa ngabantwana, kwakuzindaba ezihlonitshwa okwamagama. Kuyethusa-ke ukuthi uMphunzo wayeyizwe ngobani nango nje eseyiveza okwadida uPhehlani loLuphondo.
ULuphondo usolela uyise omncane ukuthi kusengenzeka nje ukuthi nguye owamtshelayo, umbuzo omkhulu-ke yikuthi lokhu uyabe ekwenzelani.
Besaqhubeka ngohambo lwabo abafana bakaNdlovu, kuthutsha uNkala ehamba ezihlabelela nje ebunyameni.
Sifunda ngesiko lesiNtu, ukuthi indoda yayingahambi nje ilengise izandla, kodwa-ke yayithwala induku, osekuhlukile kakhulu kulokwenzekala kulezi nsuku, amadoda asezihambela nje elengise izandla.
Sinanzelela futhi lenkolelo ebikhona ebantwini besiNtu lapho uNkala ekhuza abafana bakaNdlovu ngokuthi bangakhwazi gama lakhe ebunyameni hlezi lithathwe yimikhoba. Izolo-ke bekukholelwa kakhulu ebuthakathini.