Ngeviki edluleyo sitshiye umkhathi ukhalima ngendlela emangalisayo, sengathi lawo wawunanzelela ukuchitheka kwegazi likaMlahlwa kwaba yikho-ke ukucitsha kukaMlahlwa emhlabeni lapha.
Ekupheleni kwalo izulu uNyembezi wayesebhoda ukhalo lweMhlolweni, wayesengenwa ngamakhaza njengomuntu owayenethwe lizulu kodwa-ke okungaphezu kwakho konke wayegodoliswa ligazi.
Igazi lomuntu liyasinda umphefumulo womuntu wona wodwa nje uyazilwela, lasemuva sikhumbula uMlahlwa wayeliganyana ngempela kodwa isazela siyamtshaya ngokubulala kwakhe uSolakele aze afike esigabeni sokulungiselela ukubaleka ebuyela eGoli, wayesindwa ngumphefumulo laye.
USekaNyembezi wazidla kanengi nengi wazibuza imibuzo engela mpendulo umuntu omdala. Kwakunzima lakuye ukuthi azwisise ukuthi ngempela umntanakhe wayechithe igazi, wayebulele umuntu ngenhloso yokuphindisela.
“Konke esikwenza ensitha loba ngabuqili buni kucina ngokuvela obala, ukubulala yikubulala, loba umuntu eziphindisela.” Ngamazwi kayise kaNyembezi la, amazwi omuntu omdala. Yebo uNyembezi wayelobuhlungu elimele, isilonda esingelaphekiyo kodwa-ke kwakungayisiso isinqumo esihle ukuthi laye athathe umthetho awufake kwezakhe izandla.
Ngesenzo lesi laye sefana xathu loMhlahlwa, kakusela mehluko indlela abehlulela ngayo izehlakalo ezibafaka phakathi komumo onzima.