Imibhalo engalotshwanga: Ophezulu Stinta
Siqhubeka ngemihlobo yezaga etshiyeneyo lapho ebesikhangela khona izaga eziphathelane labantu; kesikhangele isaga esithi akuqili lazikhotha emhlane.
Sonke siyazi ngemvelo ukuthi ubuqili asonto ethandekayo kumbe eyamukelekileyo emphakathini.Iqili ngumuntu odla amandla kanye lezithukuthuku zabanye abantu okuyinto ebuhlungu okwamagama, okwenza vele iqili abantu bangafisi ngitsho lokulibona.Isaga lesi-ke sixwayisa ukuthi umuntu angabenza ubuqili bonke kodwa ngelinye ilanga nje ubuqili lobu buzavela egcekeni.
Yisaga esikhuzayo-ke lesi njalo sixwayisa kakhulu ukuthi umuntu kayekele ukuhlala kumbe ukuphila impilo yobuqili, ngoba kakusoze kubemnandi ngelanga sekwenguliwe umuntu wasala egcekeni.
Isaga: Intandane enhle ngumakhothwa ngunina. Umama wonke ulesineke njalo ulesihelo sokunakekela umntwana okuhlukileyo kakhulu emuntwini ongubaba.
Abantu bonke bahlala bekhalela ukuthi aluba inkosi ilokuthatha ngabe ithatha umuntu ongubaba itshiye umama egcine abantwana, konke kusukela ekunanzeleleni ukuthi basebebona ukuhlupheka kwabantwana abatshiywa ngonina bebatshiya laboyise bananzelela ukutshiyana kwesiphatho lokuthi obaba abenelisi ukugcina abantwana ngendlela ebakhulisa kuhle.
Umntwana wonke ubuntandane bokungabi loyise ubuzwa esekhulile. Yikho sinanzelela abantwana sebekhulile bekhala ngoyise babadinge baze babathole.