YiNtatheli kaMthunywa
KULANDELA ukuphumelela okumangalisayo kohlelo lukaHulumende lokulima lweNtwasa/Pfumvudza kusigaba sokulima sika 2020/21, uHulumende usekhethe ukugcina umfutho lo ngokubona ukuthi uyaqinisa uhlelo lolu ukuze luyephambili.
Ilizwe leZimbabwe likhangelele ukuthola amathani omumbu edlula i-3 million ngemva kwesigaba sokulima esibe lezulu njalo abalimi bebethole impahla yokulima eneleyo.
UNobhala jikelele wogatsha lwezoMhlabathi, Ezokulima, Amanzi kunye lokuhlaliswa kutsha uDokotela John Basera ngoLwesihlanu kuviki ephelileyo uthe uHulumende ukhangelele ukuletha imitshina kanye lokwenza uhlelo lokulima lweNtwasa ukuthi lube ngolwesimanjemanje.
UDkt Basera ukhulume lokhu ngesikhathi esethula uhlelo lokuqeqetsha abazafundisa abanye ngeNtwasa kusigaba sika2021/22 eFoundations for Farming eDomboshava. Uthe ukunika abalimi abancane imitshina kuzaphathisa ukuthi kufezeke uMbono ka2030 njalo kuzanika abalimi amandla. Ungenzelele wathi njengoba uhlelo lweNtwasa lusenziwa ngezandla, kudinga ukuba kube lendlela ezizakwenza yamukelwe ngcono njalo iqhubekele phambili.
Kubikwa kuhlelo lwe-Training of Trainers luzakwenza kube labaqeqetshi abalolwazi, abazaludlulisela phambili kwabanye abalimisi kanye labalimi.
Uthe uhlelo lweNtwasa luphathise ngesilinganiso se-41 phesenti kumathani angu-2,7 miliyoni omumbu.
Kukhangelelwe ukuthi amathani omumbu angu-1 066 000 avele kuhlelo lweNtwasa.