Blessing Moyo
UGATSHA olubona ngezoMhlabathi, Ezokulima, Amanzi lokuthuthukiswa kwemaphandleni lukhuthaza abalimi ukuba baqaphele amathuku andise ukuquma impande kumbe izihlahlakazana zengqoloyi.
Kumbiko okhitshwe lugatsha lolu olubona ngezokulima, kubikwa amathuku (white grubs) andise ukubizwa ngelokuthi May kumbe June beetles aquma impande kumbe isihlahlakazana sengqoloyi umlimi abe eselahlekelwa yisilimo sakhe sisakhula isivuno sicine sesisilutshwane.
“Ukulahleka kwesilimo kukhanya ikakhulu amathuku la angaba mane kumbe abe mahlanu kumitha endaweni okulinywe khona ingqoloyi.
“Okunye njalo okumele kunanzelelwe ngumlimi yikuthi amathuku la ayimihlobo etshiyeneyo njalo asiyo yonke imihlobo edla ingqoloyi,” kulandisa ugatsha lwezokulima kunkundla yokuxhumana iTwitter.
“Akula mithi eyiyo enzelwe ukulwisana lalobu ubudli kodwa kulemithi engasetshenziswa ukwehlisa inani lezibungwana lezi kwezinye izilimo egoqela imidacloprid le thiamethoxam ngesikhathi kuqala ukuqanda.”
Ugatsha lolo luphethe ngokuthi umlimi engenelisa ukwenqabela ubudli lobu ngokuphuza ukuhlanyela ingqoloyi yakhe.
“Umlimi engenelisa ukuphuza kancane ukuhlanyela ingqoloyi yakhe ukuze ehlise izinga lokulahlekelwa yisivuno njalo ukuphuza ukwenqabela ubudli lobu kuyenza umlimi abe lesivuno esincane.”