Thokozile Mbedzi
Kulomfana oleminyaka engu-15 yokuzalwa welokitshini leMpopoma koBulawayo odlwengule umntwana wakomakhelwane oleminyaka engu-9.
Umetheswacala esingeke saqamba ibizo lakhe ngoba eleminyaka engaphansi kwengu-18 kubikwa ubambe umntakamakhelwane iganyavu mhlaka 23 Ntulikazi ngezikhathi zemini.
Isikhulumi samapholisa koBulawayo uInspector Abednico Ncube ebuzwa ngodaba lolu uthe amapholisa achwayisisa ngodaba lomfana oleminyaka engu-15 odlwengule inkazana ele-9.
“Sichwayisisa udaba lomfana oleminyaka engu-15 odlwengule oleminyaka engu- 9 ngesikhathi ezidlala unina engekho.
“Umfana lo wabiza umntwana lo wamhugela endlini yakhe yokulala wamdlwengula engazivikelanga. Unina womntwana wathi ephenduka ngehola lika-6 ntambama wamfica elele okuyinto ayengajayelanga ukuyenza okwabangela ukuthi ambuze ukuthi kutheni wasechaza ukuthi umfana wakomakhelwane umhlukuluze emacansini,” kutsho uInsp Ncube.
Kubikwa unina kamamangala kazange abe esaphozisa amaseko wahle wayabikela amapholisa ahle abuya azombopha.
“Njengamapholisa sikhuthaza uzulu ukuba ngaso sonke isikhathi kaqaphele ukuba batshiya abantwana labantu abanjani njalo kumele babone ukuthi abantwana bavikelekile ngaso sonke isikhathi.
“Nxa bebatshiya kumele babone ukuthi basala lomuntu obaqapha ngelokhozi ukuze abone okwenzakalayo masinya okungavikela abantwana ekwehlelweni zingozi ezifana lalezi,” kuphetha ulnsp Ncube.