Thando Dube
ABALIMI sebekhuthazwe ukunanzelela izinto eziqakathekileyo ekufuyeni ingulube ukuze ibhizimusi yabo yokufuya iphumelele.
Ekhuluma loMthunywa uMnumzana Standish Moyo uthe kuqakathekile ukuthi abafuyi banakekele izifuyo zabo ngoba nxa zingaphilanga kuhle zilakho ukungakhuli kuhle okungehlisela inzuzo kubalimi.
“Okuqakathekileyo kakhulu ekufuyweni kwengulube yikuthi umlimi abone ukuthi zihlala zilokudla lamanzi eneleyo izikhathi zonke. Lokhu kungoba ingulube zinyamazana ezifisela ukuthola ukudla okunengi zikhathi zonke ukuze zikhule njalo zinone,” kuchaza uMnu Moyo.
Okunye okuqakathekileyo yikuthi umlimi kufanele ahlanze izibaya zengulube kabili ngeviki ukuze zingahlaselwa yimikhuhlane.
“Ingulube lazo njengazozonke izifuyo ziyahlaselwa yimikhuhlane enjengokukhwehlela, isihudo kanye lamawemusi ngakho umlimi kufanele abone ukuthi ziyathola ukuhlolwa ngabeVeterinary Services ukuze zingahlasela yimikhuhlane le.
“Ingulube njengenyamazana ezithanda ukuba phandle umlimi kufanele ananzelele ukuthi uyazihlolisa nyanga zonke ukuze azivikele emkhuhlaneni engazihlasela,” kuchaza uMnu Moyo.
“Ingulube lazo njengezifuyo zonke kumele zivikelwe emikhuhlaneni ngamajekiseni avunyelwe yinhlanganiso ebona ngalokho, iVerterinary Services,” kuphetha uMnu Moyo.