Musa Janga
ABALIMI sebekhuthazwe ukuba bahlakaniphe bathi bangathengisa izivuno zabo bathenge imithi.
Ekhuluma lentatheli kaMthunywa uNkosikazi Samkelisiwe Sibanda weFarm and City Centre ubike ukuthi umlimi oqotho kumele ahlakaniphele ibhizimusi lakhe lokulima.
“Abantu balokweyisa imibhida kodwa umlimi nxa ehlakaniphile imibhida yakhe singamenza abe ngumlimi ophumelelayo. Kulezi insuku imibhida ilemali ngakho abalimi kabayithengise kuthi imali leyo abayitholileyo bathenge imithi kumbe okunye okokulimisa kulokuthi batshaphaze imali yabo.
Esikhathini esinengi abalimi izilimo zabo zingahlaselwa yizibungu kumbe yimikhuhlane bathwala nzima ukuthi bakuvikele lokhu izilimo zize zife ngenxa yokuswela imali yokuthenga imithi yokufafaza kodwa nxa engathi ngaleyomali athengise ngayo isivuno sakhe athenge imithi kubalula ukuthi ahle avikele imikhuhlane lezibungu kungakamoneli izilimo zakhe,” kulandisa uNkszn Sibanda.
Uphethe ngokuthi ngemali yesivuno abalimi bayenelisa ukuthi bathenge lenhlanyelo.
“Ngemali yesivuno umlimi ulakho ukuthi athenge lenhlanyelo. Umlimi engenza njalo umsebenzi wakhe ubalula kakhulu ngoba kasoze adubeke ngenhlanyelo,” kuphetha uNkszn Sibanda.