Joel Ndlovu
ABAFUYI sebekhuthazwe ukuba nxa bethenge ingulube ezintsha kumele zihlolwe imikhuhlane andubana zihlangane lezinye ukwenzela ukuthi zingatheleli ezisesibayeni imikhuhlane.
Ekhuluma lentatheli kaMthunywa uMnumzana Isheunopa Dube oyincitshi kwezokulima esabelweni seMatabeleland North uthe akumelanga umfuyi ahlanganise ingulube asanda kuzithenga lalezi ekade zivele zikhona engazihlolanga ngoba nxa zilomkhuhlane ziyathelelana zife zonke.
“Kuqakathekile ukuthi umlimi angahlanganisi ingulube ezintsha lezindala zingahlolwanga ngoba zilakho ukubuya lemikhuhlane zithelele ezinye ngakho-ke kumele akufake ekhanda ukuthi kumele azihlole njalo azelaphe ngemithi ebulala leyo mikhuhlane.”
“Kulomkhuhlane wesikhumba okumele umfuyi awunanzelele ngoba uyingozi kakhulu njalo welatshwa nge -Ivermectin okuyikho okuqeda lo umkhuhlane engulubeni.
“Umfuyi kumele aphinde akhangele njalo lapho okuhlangana khona amathambo engulube zakhe ukuvuvuka lokutshisa. Nxa zivuvukile kutsho ukuthi kuyabe kulomkhuhlane eyihlaselayo ngakho ke kumele umfuyi ayelaphe ngemithi eqondileyo,” kulandisa uMnu Dube.
Uqhubekele phambili esithi ingulube ezintsha kumele zihlaliswe zodwa okwamaviki amalutshwane zingakahlanganiswa lezinye.
“Ingulube ezintsha kumele zihlaliswe zodwa okwamaviki amabili loba amathathu zingakahlanganiswa lezivele zikhona ukuze umfuyi azikhangele ukuthi ziphila njani njalo zidla njani. Kwesinye isikhathi zingahle zihlanganiswe ziyahlala zisilwa zicine zilimazana.
“Nxa ingulube ezintsha zifika kumele zihlolwe ngokuqinileyo okwamalanga akuqala amabili njalo lokhu kwenzelwa ukuthi ziphangise ukuhlaliseka.
UMnu Dube uphethe ngokuthi akumelanga umfuyi ahlanganise ingulube ezintsha lezindala ngesikhathi sokutshisa ngoba zicina zisiba le -heat stroke ebangela ukuthi zikhathazeke emoyeni okwenza zicine zihlukuluzeka.