Lucky Tshabalala
INHLANGANISO ebona ngempilakahle yezifuyo iVeterinary Services Department isikhiphe umbiko wokuthi abalimi baqaphele umkhuhlane olakho ukwehlisa inani lezifuyo kuleli owe-anthrax osekuvele ukuthi usubulele izifuyo eLupane.
Kubikwa umkhuhlane lo usuhlasele izifuyo zesigabeni seNdimimbili.
UDokotela Pollet Moyo ubikele intatheli kaMthunywa ukuba iwofisi yakhe yamukele imbiko embalwa kuviki edluleyo ngomkhuhlane we-anthrax.
“Samukele umbiko wokuthi sokulenkomo ezimbalwa esezihlatshwe ngumkhuhlane we-anthrax esigabeni seNdimimbili, eLupane lanxa nje singakatholi ukuthi zingaki inkomo esezifile,” kulandisa uDkt Moyo.
Uchaze njalo ukuba umkhuhlane lo ulezibonakaliso ezigoqela ukufa kwezifuyo eziyabe zikhangeleka ziqinile njalo kungabonakalanga ukugula kwazo.
“Inkomo lezimvu zilakho ukuba lobunzima bokuphefumula njalo zingafa ngemva kwamalanga amathathu nxa zingasahlatshwanga ngokuphangisa,” kuchaza uDkt Moyo.
Uphethe ngokucebisa abalimi ukuthi bayehlabisa izifuyo zabo kuyonale iviki ngoba bazabe bekulesi isigaba njengendlela yokuzama ukwenqabela ukumemetheka komkhuhlane lo oyingozi.