Francis Dhliwayo
ABALIMI sebeqalisile ukucetshiswa ukuthi baqalise ukwenza amacebo okulondoloza ukudla kwezifuyo ukuze zingacubi ngesikhathi sebusika.
UProvincial Chief Livestock Production Officer uMnumzana Addmore Chikowa uxwayise abalimi ukuba baqalise khathesi ukunakekela izifuyo zabo zonke ngoba kulabanye abacina bengakhangeli ezinye izifuyo ngesikhathi sokulima.
Exoxisana lentatheli kaMthunywa uMnu Chikowa uveze ukuthi abalimi abanakekeli obabhemi babo ikakhulu ngesikhathi lesi sokulima ngoba abanye ababasebenzisi ukulima yikho becina behlaselwa yimihogoyi yohlobo lwe-tape worm lama-round worm okudla phakathi emathunjini bacine besifa.
Uqhubekele phambili esithi abalimi abananzeleli ukuthi obabhemi yibo abasebenza kakhulu ngesikhathi sebusika ngoba beqinile.
“Abalimi abanakekeli obabhemi babo; kababaphi imithi yikho becina behlaselwa yimihogoyi lemikhaza bakhohlwe ukuthi yibo abasebenza nzima nxa ukudla sekukulutshwana ebusika,” kulandisa uMnu Chikowa. Uthe obabhemi kumele baphiwe umuthi obizwa ngokuthi yi-vermectin elwisana lezibungwana zamawemusi njalo ebulala imikhaza.
UMnu Chikowa uthe abalimi kumele baqalise ukwakha ingalane zokufakela utshani bezifuyo obuyibo abazabupha izifuyo ebusika.
Uphethe ngokucebisa abalimi ukuthi bathathe amahlanga kanye lokhula bayekufaka ezibayeni ukuze kwenze umquba.