Blessing Moyo
INHLANGANISO ebona ngezokulima eye-Agritex ikhuthaza abalimi elizweni ukuthi bangalimi ngezulu leli ngoba izulu lokulima kalikani.
Omunye umlimisi we-Agritex uMnumzana Zenzele Ndlovu uthe abalimi abangakwenza khathesi yikuqalisa amalungiselelo okulima hatshi ukuthi baqale ukulima.
Abalimi kabaqalise amalungiselelo okulima kodwa bengalimi ngezulu leli eline ngempelaviki ngoba alinanga indawo zonke futhi alinanga kakhulu ukuthi abalimi bangaqalisa ukulima ngalo.
“Abalimi kumele baqalise amalungiselelo okulima kodwa bengaqalisi ukulima ngoba izulu elinileyo lilutshwane njalo alinanga indawo zonke.
“Abalimi bangalima ngezulu leli, inhlanyelo yabo ingatsha kumbe ibolele emhlabathini izulu lingasabuyanga futhi.
“Izulu linile ngempelaviki kodwa alisazange lana indawana zonke kungakho sikhuthaza abalimi ukuthi njengoba selike lana kwezinye indawo kutsho lapho elingakani khona lisazakuna.
“Abalimi kabaqalise ukusondeza inhlanyelo yabo eduze kodwa bengahlanyeli ikakhulu labo abasendaweni lapho okune khona izulu ngempelaviki.
“Lokhu ngikutsho ngoba umlimi uzathi esefake inhlanyelo yakhe phansi izulu lingabe lisana inhlanyelo icine isonakala kumbe kutshiswe lilanga sekumilile okuyabe sekuyikulahlekelwa kumlimi,” kutsho uMnu Ndlovu.
Uqhubekele phambili ekhuthaza abalimi ukuthi balime izilimo ezilenhlamvu ezincane.
“Abalimi kumele babone ukuthi bayalima izilimo ezilenhlamvu ezincane ezifana lenyawuthi lamabele ngoba kuyizilimo ezingahluphi kakhulu ukulima futhi kuyizilimo ezingadingi izulu elinengi.
“Abalimi sibakhuthaza ukuthi balime bentshintshanisa izilimo zabo ukuze umhlabathi wabo uhlale ulokudla phansi njalo ungagugudeki,” kuphetha uNdlovu.