ISIFUNDO sethu salamhlanje sisukela kweseviki edlulileyo lapho esacina sihlela ukwakhiwa kwesandiso sendawo emabizweni. Nanku esikuqaphelayo ekwakheni isandiso emabizweni. Kuzo zonke izigaba unkamisa wokuqala webizo ususiwe kwathi esikhundleni sakhe kwaqaliswa ngo e- oyisakhi sesandiso ngaphandle kwesigaba 11 lapho siqalisa ngo –o.
Ekucineni: Emabizweni acina ngonkamisa –a lo –e sijobelela isakhi sesandiso u –eni bese kulandelana onkamisa, unkamisa wokucina webizo udedela unkamisa wesakhi sesandiso u –e. Isibonelo: Isigaba 3 kubizo umful(a) + -eni, isandiso ngu – emfuleni. Kubizo ilitshe elikusigaba 5, usandiso ngu elitsheni. Ilitsh(e) + -eni.
Emabizweni acina ngonkamisa – (i) sijobelela isakhi sesandiso u – ini besekulandelana onkamisa, kuthi unkamisa webizo adedele unkamisa wesakhi sesandiso u-ini. Isibonelo: Kusigaba 5 ibizo ihatshi + -ini, isandiso ngu – ehatshini. Emabizweni acina ngonkamisa –o lo –u lakho sijobelela isakhi sesandiso u-eni lo –ini bese kusithi unkamisa wokucina aphenduke usingankanisa/unxankamisa –w-.
Isibonelo: isand(o) + -eni sithole isandiso – esandweni. Ubuhlal(u) + w + ini sithole isandiso ebuhlalwini.
Funda uzwisise ukwakhiwa kwesandiso singakadluleli phambili kokunye.
Khumbula ukugeza uzandla, ufake isayeke sakho utshiye umkhandlo phakathi kwakho labanye ubhubhane lweCOVID19 lokhe luhlasela lusiyaphambili.