Siphathokuhle Ngulube
SALIBONANI bafundi. Ngithemba sihamba sonke kuzifundo zenkulumo ngomumo esihlangana lazo nxa ijaha lilungiselela ukuthatha kanti intombi layo isilungiselela ukuyakwenda. Ngeviki ephelileyo sikhangele ukuthi umnyayi othunywe kojaha ufika athini kwabo kantombi lokuthi izihlobo zentombi zingayiphatha njani. Kuvelile ukuthi umnyayi kudingeka umuntu olobungcwethi ekukhulumeni kanti njalo oligabazi. Kungenjalo abakibo kantombi bangakhwela bazehlele phezu komnyayi indaba yokuthatha kwejaha iphenduke ibeluqaqa olungaqanseki.
Nxa-ke sekukhulunywe kwavunyelwana phakathi kwabazali kwakudingeka ukuthi intombi ihambe ivalelisa izihlobo zonke izazise ukuthi yona isikhulile isisiyakwenda. Ekuvaleliseni lapha yayingahambi yodwa kodwa yayihamba lesanyongwana esingumnawakhe. Kwakubhodwa-ke izihlobo zonke zisaziswa ukuthi intombi isithole ijaha isisiyakwenda.
Izihlobo zazifika zibulale imbuzi zicola intombi le esisiyakwenda njalo ugogo kumbe onguye omdala kuleli guma lapho intombi ezovalelisa khona wayezwakala ebikela abaphansi esithi,
“Lina badala, bogogo labokhulu, nangu umntwana usekhulile, usefuna ukuzibonela empilweni, mvikelenini, lihambe laye limeluse khonale.”
Okhuluma le inkulumo ngomumo wayeyabe ephethe igwayi ethela phansi. Kwakuthi nxa eqeda ukwenza lokho, zizwakale izalukazi zisithi.
“Li! li! li! li! akubekuhle badala! Limvulele indlela umntwana!”
Izinkulumo ngomumo ezingaphezulu zazande ukuzwakala lapho intombi yende kuhle njalo ngokusemthethweni. Izihlobo zonke zazijabula kakhulukazi. Inkulumo ngomumo lo yayikhulunywa yizihlobo zonke nje lapho intombi evalelisa khona.
Izinkulumo ngomumo ezingaphezulu ziyaveza-ke ukuthi abadala babekholwa ukuthi abaphansi kumele babikelwe ukuze konke kuhambe kuhle. Kwakukuhle okunye ukuhamba kwentombi ivalelisa izihlobo kwakuqinisa ubudlelwano bezimuli njalo kwenze lomendo wentombi ube lesithunzi.
Asihlanganeni ngeviki ezayo sesikhangele ukuthi ijaha lona liqhubeka njani.