Wayne Ncube
INKAMPANI yenhlanyelo iSeedco isikhuthaze abalimi ukuthi bangalahli ithemba ngoba zikhona izilimo ezilimekayo ngesikhathi sokutshisa njalo ezilenzuzo enhle.
Abalimi kubikwa bangalima izilimo ezifana, lamathanga, ama-cucumber kanye le-paprika.
Ekhuluma lentatheli kaMthunywa uNkosazana Ayanda Tshuma oyingcitshi kwezezilimo uthe abalimi sebengalima iloba kutshisa ngoba kulezilimo ezinengi abangazilima njalo lokhu kungabenza babe lenzuzo emkambo ngoba abalimi abanengi bejwayele ukulahla ithemba ngalesi isikhathi sokutshisa.
“Abalimi abanengi kabalimi ngesikhathi sokutshisa ngoba bengakwazi ukuthi balima iphi imihlobo yezilimo, njalo umkambo walezi zilimo uyabe uphakeme ngesikhathi sokutshisa ngoba abalimi abanengi bengasoze begijimise ukulima ngalesi isikhathi besesaba ukulahlekelwa kodwa umlimi engalima kuhle lezi izilimo angathola inzuzo emangalisayo.
“Ukulima ama-cucumber kulula ngalesi isikhathi, umlimi kumele angawalimi khatshana khatshana ngoba esenzela ukuthi athelele kuhle, etshiya isikhala esingange 40cm ngaphakathi ephinde ehambe efaka intanga zenhlanyelo ezimbili kumbe ezintathu, umlimi kumele ahlakulele nxa i-cucumber lakhe seliku 6-8 inches ubude afake lotshani phezulu ukuze amanzi engalahleki lula,” kuchaza uNkszn Tshuma.
Uphinde wagcizelela ebonisa ngendlela abalimi abangalima ngayo ezinye ezilimo ezifana lamathanga kanye le-paprika.
“Kulamanye amathanga avele ehlala emancinyane, lawa mahle kubalimi abalima ezivandeni. Umlimi engathola amathanga amathathu kumbe amane kabophe lapho azale khona, lokhu kupha izilimo ukudla konke okufunekayo ukuthi akhule kahle.
“I-paprika yona ilimeka kuhle umlimi engatshiya 18-24 inches phakathi laphakathi kwezilimo, isilimo lesi siyagejelwa kakhulu phansi njalo siyalimeka lasemagabheni ngoba sifuna amanzi angathi manengi kodwa siyakhula ngesikhatshana,” kuphetha uNkszn Tshuma.