Thokozile Mbedzi
NGENHLOSO yokwehlisa indleko isikolo seJZ Moyo High School sesisungule iphurojekithi yokufuya ingulube kanye lokulima imibhida.
Kubikwa amaphurojekithi la aqaliswe kuyonale ithemu.
Umphathi wesikolo lesi, uMnumzana George Ndlovu ubikele abazali emhlanganweni jikelele ngoMgqibelo ukuthi baqale ukuhlela ngephurojekithi lezi kumnyaka ophelileyo.
“Sananzelela ukuthi silendleko ezinengi kakhulu nxa kungaba lemicimbi yesikolo kanye lezinye indingeko ezimane nje zivele zingahlelelwanga.
“Khathesi kunje izikhukhula ezihlasele indawo yakithi sezithethe injini zethu zamanzi kwaze kwaba kane. Lokhu kwenza sibe lendleko zokuyadinga amanzi kungakho amaphurojekithi ethu la ayasiphathisa kakhulu ngemali,” kutsho uMnu Ndlovu.
Intatheli yephephandaba likazulu yenelise njalo ukuxoxisana loMnu Ndlovu yena oveze ukuthi ikhomiti yananzelela ukuba kulendawo enkulu esikolo kungakho babona kufanele ukusungula amaphurojekithi la ukuze bathole imali yezinye indleko zesikolo kanye lesitshebo sabafundi.
Uqhubekele phambili esithi ngaphandle kokusiza ngemali amaphurojekithi la azafundisa abafundi ngokufuya kanye lokulima.
“Imisebenzi yezandla iqakathekile kakhulu kungakho amaphurojekithi asekhona esikolo azaphathisa abafundi ukuthi bakwazi ukufuya kanye lokulima. Lokhu njalo kuzaphathisa ngentuthuko elizweni,” kuchaza uMnu Ndlovu.