Wayne Ncube
ABALIMI sebexwayiswe ngokuqakatheka kokuba bahlale belemithi yokubulala izibungu ezilinyweni kumbe ezifuyweni.
Ekhuluma lentatheli kaMthunywa uMnumzana Raphael Ncube oyingcitshi kwezemithi yezilimo lezifuyo esitolo seFarm and City Centre uchaze ngokuqakatheka kokuba abalimi bahlale belemithi ukuze bavikele izilimo ezifana lemibhida.
“Izibungu ezivame ukuhlasela imibhida zintwala (ama-aphids) zona ezimunya amanzi emibhideni okwenza iswabe njalo ingakhuli.
“Intwala lezi ziyaswabisa umbhida uthole amahlamvu akhona esegoqekile. Umuthi oqeda izibungwana lezi yi-Dimethoate,” kuchaza uMnu Ncube.
Uqhubekele phambili esithi kuleminye njalo imikhuhlane yama-fungal lezibonakaliso zakhona emibhideni.
“Imikhuhlane ebangelwa yizibungwana ezincane (fungal) ibonakala ngokuthi imbhida iyaphenduka umbala ingathi iba lithanga. Umkhuhlane lo uqedwa ngokufafaza umuthi okuthiwa yiDithane kumbe iCopcure.
“Umuthi ongasetshenziswa ngabalimi ukuqeda izibungu lezi ezibakhona emibhideni yi-Roger njalo wonke umlimi kumele ahlale elayo,” kulandisa uMnu Ncube ngemithi yokusebenzisa eyehlukeneyo.
UMnu Ncube ungezelele wathi abalimi kumele ukuhlale belemithi okuthiwa yi-Copcure, Dithane leDimethoate ukwenzela ukuthi nxa imikhuhlane ingahlasela izilimo zabo benelise ukuzivikela masinyane.
UMnu Ncube uphethe ngokuthi kuqakathekile ukuthi abalimi bavakatshele ezitolo zabo ukuze babelolwazi ngokusebenza kwemithi eyehlukeyo ukuze benelise ukuvikela izilimo zabo.