Ncekwenhle Ncube
UHULUMENDE usechaze ukuthi bonke abalimi abangaphansi kohlelo lweCommand Agriculture bazabhalwa imali zabo ngesikhathi esifaneleyo.
Ekhuluma ngesikhathi evula umbukiso weZimbabwe International Business Conference ngokusemthethweni eZimbabwe International Trade Fair ngoLwesithathu kuviki edluleyo, uMsekeli kaMongameli welizwe uKhomuredi Emmerson Mnangagwa uthe abalimi bazabhadalwa indleko zabo masinya ukuze belungiselele ukulima ingqoloyi ngesikhathi somqando.
“Ngenhloso yokuthi abalimi bazuze imali yokubhadala indleko zabo ngesikhathi belungiselela ukulima ingqoloyi ngesikhathi somqando uHulumende uzabona ukuthi baphiwe imali zabo ithuba lisavuma.
“Sesilungiselela ubusika ngoba silalele abachothozayo abavela kunhlanganiso ezizimele zodwa abebeveza lapho esehluleka khona. Kuhle kakhulu ngoba kwenza senelise ukuqhubekela phambili silungisa amaphutha ethu sihlale njalo silibandla elikhokhelayo,” kutsho uKhmrd Mnangagwa.
Ubuye njalo wachazela abalimi ukuthi uHulumende selemali engenelisa ukuthenga amathani ayi 1,3 miliyoni asefike esiphaleni sesizwe seGrain Marketing Board.
UKhmrd Mnangagwa uthembise abalimi ukuthi bazasebenza nzima ukuthi bathole eyinye imali ezasetshenziswa ukuthenga izilimo eziza esiphaleni selizwe.
Abalimi bonke abangaphansi kohlelo lukaHulumende lweCommand Agriculture bathenjiswe ukuthi bazazuza inhlanyelo lakho konke okungadingakala ngesikhathi sokulima ngenyanga kaNcwabakazi ukuze benelise ukuhlela kuhle.
Uthe abalimi kumele bebone ukuthi bayasebenzisa imvundiso eyaneleyo ngesikhathi belima kanye lenhlanyelo ezilohlonzi. Lokhu kuzenza isivuno sibe sihle njengalokhu kwenzakele lonyaka.
Kuphenyo oluvela kuAgricultural Marketing Authority iGMB ilentengo ephezulu ekuthengeni izilimo ezinengi ilandelwa yiStaywell.