SIQHUBEKA ngendlela ezitshiyeneyo zokuhlabusisa ulimi lwethu, lapha sikhangela imihlobo yezifenqo zenkulumo ezitshiyeneyo. Kesikhangele umhlobo wokubhuqa, ukukhuluma ngendlela ebhuqayo.
Lapha-ke sisuka sikhulume ngendlela engathi iyabuka kumbe iyancoma lokho okukhulunywa ngakho kodwa kubesegcekeni kubesobala ukuthi leyonto siyayihleka okwamagama. Yindlela yokubuka ngokuhleka umuntu ecatshile. Kesikhangele izibonelo zokubhuqa:
(1): UmntakaDube ayisibuhle nje ngamakhala amakhulu angani ngawemvubu. Ubuhle obunconywayo lapha siyabuswela sibili nxa umuntu wakhona ezabuya afaniswe lekhala elesabeka okwamagama. Kudinga nje umuntu ayilalelisise inkulumo yakhona ukuthi iphetha ngelithini ukuze kucace ukuthi yikuncoma kweqiniso na lokhu.
(2) UThabo uyazitshaya inombolo kambe ezuze iqanda elibolileyo emhlolisweni. Umuntu uyazibuza ukuthi pho lezo nombolo uzitshaya kumbe uzazi njani ezabuya angatholi lutho emhlolisweni pho kuyini okunconywayo lapha kubasobala ukuthi kakulatho ngitsho olunconywayo lapha ngaphandle kokuhleka kuphela.
(3) Umalukazana omutsha ukhuthele okwamagama utshona elele njengenyoka yothamele ilanga. Lakulesi isibonelo kusobala ukuthi kakukho ngitsho ukukhuthala kulo malukazana olapha, livila elihoqayo. Inkulumo yokubhuqa iyileyo njalo evika ukuxabanisa abantu izikhathi ezinengi ngoba yona vele isola okubi njalo kungeke kuthiwe bhadla kulowo osolwayo kumbe okukhulunywa laye kuvikwa ukuvusa izimpi.