Siqhubekela phambili sichaza ukudla kwesintu ngenjongo yokuthi umuntu aba lawo umfanekiso walokho okukhulunywa ngakho.
(1) Amakhomane
Yikudla kwehlobo njalo ahlanzwa zintanga, kumele akhiwe esebuthakathaka angaqina kawadleki. Abanye bawadla lochago amanye bawadle enjalo.
(2) Amajodo
Amajodo aphekwa adliwe njengomxhanxa kumbe inopi. Inopi/isijeza iphekwa ngejodo lempuphu. Ijodo likhutshwa amaxozela kumbe uqweqwe lwangaphandle likhutshwe lentanga lifakwe embizeni, nxa selivuthiwe kufakwe impuphu. Kayijiyiswa njengesitshwala, ingaphekwa ngomfahla, umumbu ocholiweyo.
(3) Umxhanxa
Uphekwa ngamagwadla athi nxa esevuthiwe kuthathwe ijodo likhutshwe amaxozela ligatshwelwe-ke embizeni yamagwadla kuyekelwe kuvuthwe ndawonye. Nxa sekuvuthiwe sekungadliwa ke usungumxhanxa.
(4) Unkankalu
Lwenziwa ngamajodo. Ijodo liyasikwa lenziwe incezu ezincinyane kukhutshwe amaxozela. Incezu lezi ziyachaywa zonyiswe. Ebusika ziyaphekwa ngempuphu. Ukudla lokho kubizwa ngokuthi yinopi kumbe isijeza sonkankalu.
(5) Umfahlwa
Yisinkwa esiphekwa ngomumbu omanzi. Umumbu omanzi uyahlutshwa ucholwe ube usubunjwa usenziwa izibhebhedu uphekwe. Zingadliwa zinjalo kumbe zicubuzwe kuvuthwe ngamasi. Yiwo njalo umumbu lo opheka inopi yomfahlwa.
(6) Inkobe
Kuphekwa umumbu owomileyo, uhlanganiswe lendlubu kumbe kuhlanganiswe lendumba. Yikudla okudliwa kakhulu ebusika.