ZULU, ZULU BUYA…ama Chevrons abuyela enkundleni le Pakistan

27 Oct, 2022 - 00:10 0 Views
ZULU, ZULU BUYA…ama Chevrons abuyela enkundleni le Pakistan

uMthunywa

Nkosilathi Sibanda

ALUBA izulu kalinanga mhla kudibana iqembu lamaChevrons lamaProteas umdlalo lo ubuzahlala uyindaba esegudwini yokuba badliwa.

Kwanceda ukuna kwezulu, umdlalo lo awuzange usaphela. IZimbabwe iphakathi kokulwisana lamanye amazwe azingcitshi zekhililikithi kumqhudelwano we-International Cricket Council T20 World Cup elizweni le-Australia.

Ngokunjalo lamuhla abafana beZimbabwe bazafisa ukuthi izulu line futhi nanko baphindela enkundleni kumdlalo wabo wesibili bele-Pakistan kuhlandla le-Super 12. Umdlalo lo umkhulu njalo unzima.

NgoMvulo kwana izulu ngesikhathi iSouth Africa isiqalile ukutshaya ibhola sengathi ithunyiwe. Ngamabhola ayisithupha okuqala, amaProteas ayetshaye 23 runs, okwahle kwethusa ngoba kwaveza ukuthi iZimbabwe yayingeke ikuvale lokhu. Umdlali omkhulu weSouth Africa uQuinton De Kock waba le-47 runs, kumabhola angu-18.

Kusenjalo umqeqetshi wamaChevrons uDave Houghton ukhiphe umbiko ngokudana kwakhe esithi onompembe kwakungamelanga bavumele umdlalo lo uqhubekele phambili.

Kungumbono kaHoughton ukuthi kwakukhanya ukuba izulu lizakuna, ngakho kwakungadingeki ukuthi abadlali bangene enkundleni.

Umcubunguli womdlalo wekhilikithi koBulawayo uThemba Ncube ubikele intatheli kaMthunywa ukuba kuhle ukuthi umdlalo weZimbabwe leSouth Africa awuzange uphele ngoba kwakuzayangisa.

“Sasizaphathwa zinhloni. NgoMvulo bekuzalotshwa imbali entsha kuT20 World Cup ngoba ama-Chevrons ayezatshaya ibhola ngendlela angakaze ibonakale. Sibonga izulu,” kutsho uNcube, ophinda abengumlandeli weqembu leTuskers.

Lamuhla ngehola lakuqala emini, amaChevrons azadlala lePakistan kumdlalo wesibili.

Kulumdlalo kwehlele kuPakistan ngoba imbali iveza ukuba iqembu leli lilamandla lobungcitshi ukwedlula amaChevrons. Ingqobe ikuHoughton lokaputeni welizwe uRegis Chakabva.

Lo yiwo umdlalo okumele iZimbabwe iwunqobe nxa ifuna ukuba sendaweni ehloniphekayo kukhilikithi.

Loba inhloso kaHoughton kwakuyikufinyelela kuhlandla le-Super 12, lamuhla kuzamele atshengisele ukuthi ulamaqhinga okudlulisela iqembu kuhlandla elilandelayo.

Share This:

Sponsored Links

Survey


We value your opinion! Take a moment to complete our survey
<div class="survey-button-container" style="margin-left: -104px!important;"><a style="background-color: #da0000; position: fixed; color: #ffffff; transform: translateY(96%); text-decoration: none; padding: 12px 24px; border: none; border-radius: 4px;" href="https://www.surveymonkey.com/r/JRD3VTT" target="blank">Take Survey</a></div>

This will close in 20 seconds