uMthunywa
YiNtatheli kaMthunywa
IQEMBU leHighlanders liphakathi kwetshe lembokodo ngodaba lokudinga umqeqetshi, nanko kuyacaca ukuthi ngeSonto lizadlala kungela okhuza abadlali.
Osabambe isikhundla somqeqetshi kuleliqembu uJoel Luphahla kasoze enelise ukwenza lokhu mhla abadlali bakhe bedibana leqembu leHarare City enkundleni yeBarbourfields. Lokhu kungenxa yokuthi inhlanganiso yeZifa yanikeza uLuphahla ithuba elilodwa lokuthi aqeqetshe engelancwadi ze-CAF A ezimvumela ukuthi ahlale ebhentshini.
UMohamed Fathi
Okwakhathesi, uLuphahla uqina ngokulolonga abadlali encediswa nguMelusi Sibanda umqeqetshi weBosso 90.
Umqeqetshi lo wenelise ukukhuza iqembu ngempelaviki edluleyo iBosso ivakatshele iZPC Kariba enkundleni yeNyamhunga. Umdlalo uphele kungutshiki lobhanqa, kungela elihlohlileyo.
UKelvin Kaindu
Umaqhuzu weBosso uRonald Moyo, ekhuluma lentatheli yephephandaba likazulu uthe bayazi mhlophe ukuba udaba lomqeqetshi kumele lulungiswe, ngakho abalandeli bazatshelwa ngokuya kwesikhathi.
“Sisamdinga umqeqetshi. Siphezulu komsebenzi. Abalandeli beqembu bazatshelwa ngesibanga esikuso,” nguMoyo lo okhethe ukuthi angavezi okunengi.
UPhilani Ncube
Iphephandaba likazulu lidingisise ngabaqeqetshi asebekhulumisane leHighlanders kwavela amabizo aboMark Harrison, uKelvin Kaindu, Pieter de Jongh, Mohamed Fathi lo-Amini Soma-Phiri.
Umfakazi oqotho oseduzane lokwenzakala kuHighlanders uncwebe uMthunywa indlebe wathi abanye abaqeqetshi okukhulunywe labo nguJavier Martinez Espinosa weMexico, Serbian Heric Vladislav loPhilani Ncube owaxotshwa kuBulawayo City.
UMark Harrisonn
Iqembu leli lidinga umqeqetshi ngokuphangisa ngoba lihlezi kusimo esinzima kungalane ye-Castle Lager. Liphethe imklomelo engu-17 njalo kumidlalo engu-16 edluleyo, lenelisa ukunqoba emithathu. Ngaleso sikhathi beliqeqetshwa nguMandla Mpofu.
UPieter de Jongh
Inkokheli zeBosso zilala zingalele zidinga iqhinga lokuvuselela iqembu elikhanya lingaphunyuka kuligi ephakemeyo nxa lingaqhubeka linganqobi.
UJavier Martinez Esapinosa
“Banengi abaqeqetshi abafuna umsebenzi weHighlanders. Agcwele ama-CV ewofisini yethu. Angiboni ukuthi ilanga langeSonto lingafika kungazange kumenyezelwe umqeqetshi omutsha,” kutsho umfakazi lo.
UHeric Vladislav
“Ngesikhathi esifaneleyo bazabika kuzulu ukuthi ngubani umqeqetshi. Into abangayifuniyo abadala yikutatazela.
Phela iHighlanders liqembu elibekekileyo, elaziwa ngobungcitshi bokwenza umsebenzi.”
IHighlanders isiqede phose ingxenye yesizini isadalala. Kukhangelelwe ukuthi umqeqetshi omutsha akutshintshe lokhu.
