uMthunywa
Bongani Ndlovu
ABALIMI bakhuthazwa ukulima indumba ngoba ziyaphangisa ukuvuthwa njalo azilamsebenzi omnengi.
Ekhuluma loMthunywa uMnumzana Ayanda Bhebhe ongumlimi uthe abalimi abahlakaniphileyo akumelanga balahle ithemba ngezilimo zabo ezatshiswa lilanga kodwa kabahlanyele izilimo lezi eziphangisa ukuvuthwa endaweni ezilinywa zithelelwa.
“Inengi labalimi lilahlekelwe kakhulu ngokuphuza kokuna kwezulu, izulu lithe selibuya lonyaka izilimo ezinengi sezitshile, kodwa abalimi bangahlali phezulu kwezandla bathi sokwehlule emasimini.
“Abalimi kabalime izilimo ezinjengendumba ikakhulu omaqutha, ziyaphangisa ukuvuthwa, njalo imihlobo yendumba enjengale umlimi uthola lemibhida azayenza ibe ngumfushwa lawo ozamnika inzuzo nxa sewuthengisa emakethe,” kutsho uMnu Bhebhe.
Uqhubekele phambili wathi abalimi kababekwazi izilimo eziphangisa ukuvuthwa ezingahluphiyo njengendumba ezivuthwa ngesikhathi esifitshane.
“Mina ngithe ngibona umumbu wami sutshile ngahle ngadinga inhlanyelo yendumba ikakhulu lezi ezesintu ezemakhaya, ngihlanyelile sezimilile njalo ngizaqhubeka ngizithelela zize zivuthwe,” kuchaza uMnu Bhebhe.
Ugcizelele wathi ukulima indumba kanye lezinye izilimo eziphangisa ukuvuthwa kulicebo elihle kakhulu.
“Inengi labalimi eMatabeleland lilahlekelwe sibili salima kungela zulu izilimo zatsha, kodwa akumelanga silahle ithemba njengabalimi sizakudlani? Kumele silime khonokho okuphangisa ukuvuthwa, indumba zona kaziphuzi ngitsho njalo ekuvuthweni kwazo akuphumi ndumba zodwa lemibhida uyayithola.”
“Okuqakathekileyo yikuthi njengabalimi silalele ababona ngezomkhathi nxa besithi izulu lizakuna ngasiphi isikhathi singagijimeli ukulima kungela zulu ngoba sidlalisa lenhlanyelo,” kuphetha uBhebhe.
