uMthunywa
Bongani Ndlovu
UKUPHELA kukaNhlangula kuza lomcimbi omkhulu wakoBulawayo oweRoil Bulawayo Arts Awards ozakwenziwa emagumeni eZimbabwe International Trade Fair ZITF lapho ingcitshi kwezokuzithokozisa ezizaphiwa khona indondo zokwenza kuhle kunhlangothi ezitshiyeneyo ngoMgqibelo ebusuku.
Umcimbi wangoMgqibelo uzabe ungowesithathu kusukela wasungulwa koBulawayo. Umcimbi lo ohlokomisa abadlali bakoBulawayo kwezokuzithokozisa usudumile ngokuhamba phambili ekunanzeni imisebenzi eyenziwa ngabadlali abaphethe ezokuzithokozisa koNtuthu ngokuthokozisa abantu ngezomculo, ezokuhlabela, ezokulingisa kanye lokunye okutshiyeneyo.
Indondo ehamba phambili ngeyomculi opheke ingoma ethandwa nguzulu. Lonyaka abaculi abazalwela lindondo balezingoma ezitshisa bhe ezifana lengoma kaZinjaziyaluma ethi Ebunandini, uBambelela kaNovuyo Seagirl elodumo oluphezulu, uCal_Vin laye uza ngengoma yakhe ethi Banjalo Abantu, uBekezela kaLorraine Stot kanye lekaMakhosi ethi Emathandweni.
Ekhuluma lentatheli kaMthunywa umhleli womcimbi uNkululeko Nkala ubike ukuba umcimbi walonyaka awukhangeli abadlali bakoBulawayo kuphela.
“Umcimbi walonyaka awukhangeli iBulawayo kuphela, lonyaka sibuye lendondo entsha ekhangela abaculi abangahlali koBulawayo kodwa abalesandla ekuxhaseni abadlali bethu bakoBulawayo,”
“Indondo yethu le entsha ibizwa ngokuthi Outstanding Arts Personality from Outside Bulawayo, indondo le izabe ijonge ukubonga imisebenzi yalabo abangahlali koBulawayo kodwa abalesandla ekuthuthukiseni abadlali bakhona,” kuveza uMnu Nkala.
Uqhubeke waqoqonsela ukuba kuzabe kulemidlalo eminengi kumcimbi walonyaka ezabe igxozisa indenda.
“Umcimbi walonyaka uzabe umkhulu okumangalisayo ngoba indlu yalonyaka ithwala abantu abangu 4 500, sibize bonke abahlabeleli bakoBulawayo ukuthi babuye bazohlabela,”
“Ngaphandle kokuba kube lenguquko kwezemali akula bunzima obunengi esihlangane labo ngoba besilazo inhlanganiso ezinkulu esisebenzisana lazo ezifana leRoil, NetOne, Proton Bread kanye lamanye amankampani amakhulu,” kuphetha uMnu Nkala.
