Nkosilathi Sibanda
ASEZAQALA ukudibana kunkezo ye-Chibuku Super Cup amaqembu adlala kunkundla zePremier League nanko phela kubikwa umqhudelwano uzaqala mhlaka 9 Ncwabakazi.
Wonke amaqembu azafuna ukuthi alolongele ukuthi enze kuhle ukuze afohlele kusigaba esilandelayo senkezo.
Inhlanganiso yePremier Soccer League, ibambene labaxhasi bayo bamemezele ukuhlelwa kwamaqembu ngoLwesithathu ekuseni.
Leqembu elichinsa inkundla zePSL eleSheasham, eliqeqetshwa nguLizwe Sweswe, selilinde ngabomvu ukuthi lalo lizibonakalise. Umqeqetshi lo wazise iphephandaba likazulu ukuthi uzalwela ukuthi abafana bakhe benelise ukufika kusigaba ezilandelayo.
Kumdlalo wakuqala, iSheasham izadlala leManica Diamonds.
“Siwuzwile umbiko wokuthi iChibuku Super isizaqalisa. Njenga yonke imidlalo, sizalungiselela ukuthi sedlulele phambili,” kutsho umqeqetshi lo.
IBulawayo Chiefs izabe ingqikilana leHighlanders, kumdlalo ozadonsa amehlo ngoba kudibana omakhelwane, kodwa umdlalo ongaba mkhulu njalo ngowe-CAPS United leDynamos.
Umqeqetshi weHwange uNation Dube ukhulume lentatheli yephephandaba likazulu lapho aveze khona ukuthi bayiwomele iChibuku Super.
“Angeke sifune ukudliwa masinyane kulinkezo, kuyinhloso yethu yokuthi sidlalele ukuthi siyethwala inkezo le. Lathi besilesifiso sokuthi sibizwe njengentshanthsu yeChibuku Super Cup, akula okungasehlula,” kutsho uDube, odume ngelithi “Malume” emdlalweni.
Imidlalo yeChibuku Super Cup, ngokuhlelwa kwamaqembu ngoLwesithathu:
Highlanders v Bulawayo Chiefs; Ngezi Platinum v Triangle; Manica Diamonds v Sheasham/Black Rhinos
Dynamos v Simba Bhora; Chicken Inn v Green Fuel; FC Platinum v Yadah/Cranborne Bullets; CAPS United v Hwange; Herentals v ZPC Kariba
