AMAPHOLISA akholelwa ukuthi izithandani zeMoscow eRussia ezisolwa ngokudla abantu ababalelwa ku-30 beziqala ngokubadakisa ngezidakamizwa zokulala, bese zibaxebula isikhumba bephila.
Lezi zithandani okunguNatalia Baksheev lomkakhe wakhe uDmitry Baksheev kusolwa ukuthi bezisidla izicubu zabantu, ezinye zibekwe efrijini, ezinye bezicina zifakwa emagabheni.
Amapholisa eKrasnodar aqale ukuphenya ngabo ngemva kokutholwa kweselula emgwaqeni elezithombe zowesilisa esidla amalunga omzimba ahlukahlukeneyo.
UDmtry Baksheev usolwa ngecala lokubulala elilodwa, kodwa amapholisa asola ukuthi uyathinteka ekudukeni kwabantu abangu-30 kulindawo okuhlala abantu abedlula abangu- 750 000.
Ngesikhathi kusabatshazwa izithombe ezatholakalayo, amapholisa athola isidumbu sowesifazane oleminyaka engu-35 sicuyiwe, eduzane lalapho okuhlala khona lezi zithandani.
Kubikwa ukuthi lezi zithandani kungenzeka ukuthi zaqala “ukudla abantu” ngo-1999. Uma betholwa belecala, lezi zithandani zizangena ohlwini lomalugaju abalesibalo esiphezulu sabantu abababulala eRussia.
Lonyaka, kugwetshwe ipholisa uMikhail Popkov, owaphumela obala ngokubulala abantu abangu-81 kulelizwe. — The Washington Post