uMthunywa
Nkosilathi Sibanda
“I-HIGHLANDERS ingabe yehlulwa kumdlalo wayo leFC Platinum kodwa ngicabanga ukuthi izabuya ivutha bhe kumdlalo wayo lathi.”
Lo ngumbono kamongameli weChicken Inn FC uLifa Ncube ngomdlalo ozadibanisa iqembu lakhe leHighlanders kuligi yeCastle Lager Premiership okhona enkundleni yeBarbourfields ngeSonto.
Utsho kanje kulandela ukunqotshwa okwakuqala kweHighlanders lonyaka. Inqotshwe yiFC Platinum nge 2-0 ngemva kwemidlalo engu-19, kungela elenelisa ukuyitshaya ekaMatshobane.
Kulokhu, iChicken Inn kayivumi ukuthi izadlula kalula phezulu kweBosso.
Kodwa, akwaziwa ukuthi yiphi ezaphetha impelaviki iphezulu kweyinye, phakathi kwezimbili lezi ezingomakhelwane edolobheni lakoBulawayo.
uBrian Muza
Ngokuzwa kwephephandaba likazulu, iChicken Inn ikhala ingaqedi ngokulimala kwesithenjwa saso uBrian Muza, nanko nguye umdlali obekukhangelelwe ukuthi aguqule izinto mhla bedlala leBosso, iqembu eselithwalise ezinye amagabha avuzayo kulumkhankaso wenkezo yeligi ephakemeyo kuleli.
UMuza kuyaziwa ukuthi nxa esethe walibamba ibhola, kuyaziwa ukuthi ubengaphuzi ukupha abagadli abagijima becele ezinyaweni beqonde egedini njengoMichael Charamba loMarlvin Hwata. Abadlali laba nxa bengena ebhokisini bajwayele ukuhlohla.
Umqeqetshi weChicken Inn uPrince Matore loba ekwazi mhlophe ukuthi ubhekane lesitha esikhulu, ubike ukuba uleqhinga lokuyinqoba iHighlanders.
“Loba sisafuna ukuwakhangelisisa kuhle amaqembu aphezulu, kuzamele sidinge ukusebenza nzima.
Umdlalo wethu olandelayo ngosidibanisa leqembu elisemlonyeni okwamanje, iHighlanders.
“Ngeke sigxile kakhulu ekuhlulweni kwabo yiFC Platinum kodwa sizagxila kuhlelo lwethu lomdlalo. Bazabe besenkundleni yabo, ngakho ngeke kube lula ukudlala labo eBarbourfields. IHighlanders,” kutsho uMatore.
Amazwi kaMatore amukelwe ngumongameli weChicken Inn uLifa Ncube, otshele intatheli kaMthunywa ukuthi bahlezi beqaphele.
“I-Highlanders ingabe yehlulwa kumdlalo wayo leFC Platinum kodwa ngicabanga ukuthi izabuya ivutha bhe kumdlalo wayo lathi. Ngeke kube yikuhlakanipha nxa singayithatha kancane. Baliqembu elikhulu kodwa ngilethemba elikhulu lokuthi sizakulwa ngeSonto. Kuthembisa ukuthi kuzoba ngumdlalo omuhle kakhulu,” kutsho uNcube.
Kulumdlalo, abaqeqetshi beHighlanders kabazange babelombono ngesikhathi sekusiyadindwa iphephandaba likazulu ngoba balinde ukwethula umbono wabo ngoLwesine emini.
Ama-Gamecocks wona azitshaya isifuba ngoba kukhanya ahlohla amabhola ukwedlula abagadli beBosso. Ngesimo sengalane yeCastle Lager okwamanje, iChicken Inn isihlohle amabhola angu-19, iHighlanders isihlohle angu-16. IBosso iyakhokhela kulogu ngemiklomelo engu-41 ngemva kwemidlalo engu-20, kuthi omakhelwane bona bakunombolo yesihlanu bephethe imiklomelo engu-32.
UMatore uthe inombolo kazitsho lutho kuye.
“Inombolo zibalulekile kodwa lokho akusikhathazi. Siwulindile umdlalo wethu leHighlanders.”
Kweminye imidlalo, iBulawayo Chiefs inxuse iFC Platinum enkundleni yeLuveve. Abafana benkabazwe, iSheasham bazadlala lezimbamgodi zeHwange eBata.
Imidlalo yonke ngokugcweleyo:
NgoMgqibelo:
Bulawayo Chiefs v FC Platinum (Luveve), Sheasham v Hwange (Bata), Simba Bhora v Yadah Stars (Baobab), Cranborne Bullets v Dynamos (Nyamhunga), Herentals v Ngezi Platinum Stars (Mandava), Manica Diamonds Green Fuel (Gibbo)
NgeSonto:
Highlanders v Chicken Inn (Barbourfields Stadium), Triangle United v ZPC Kariba (Gibbo), Caps United Black Rhinos (Bata)
