uMthunywa
YiNtatheli kaMthunywa
INHLANGANISO yeZimbabwe Boxing Federation (ZBF) isithabise abadlali be-boxing esabelweni seMatabeleland North ngokukhetha ukuthi yenze umkhosi wemidlalo yentshantshu zodwa eFolosi kulimpelaviki.
Imidlalo le izaphuma lengqwele zokujikwa kwengqindi ezizamela isizwe kumidlalo yomhlubulo weZone 4 eAfrica ezaqhutshelwa ezweni leAngola. Kulumkhosi, inhlanganiso yeZBF isebenze lequla eliphethe umdlalo esabelweni seMat north.
Ukuqhuba imidlalo le kuzabe kungokwakuqala kulumango lapho abalandeli be-boxing abajwayele ukubukela amadoda esilwa enkundleni zedolobho leHwange kuphela.
Kumbiko othunyelwe iphephandaba likazulu ngemeyili, iZBF ithe imidlalo yengqindi le ivunyelwe kubo bonke abazizwa belethalenta lokutshaya enkundleni.
“Abadlali abaphuma kumaqembu e-boxing kuzabelo zonke banxusiwe kumidlalo le. Inhlanganiso yeZBF iqhuba imidlalo le okwesibili kulandela ukusungulwa eMarondera ngoNhlolanja.
“Abadala labantwana bavunyelwe ukuthi bazophatheka. Wonke amaqembu aziwa edlala i-boxing anxusiwe ngoba sidinga ukubumba lokukhetha abadlali abazamela iZimbabwe kumidlalo ebalisa eyeZone 4 eAngola kulumnyaka,” kutsho umbiko lo.
Phakathi kwamaqembu alodumo kulumdlalo azathumela abadlali eFolosi kulebutho lesizwe elandise ukuza labadlali abanengi, iLobengula, iSizinda, iHwange, iMatabeleland South, iMbare Boxing Club, St Mary’s lezinye.
Iqula elizakuya eAngola likhangelelwe ukuthi liqale khathesi amalungiselelo ayo ngoba imidlalo isekupheleni kwenyanga kaMabasa.
Ukuqhutshwa kwemidlalo le eFolosi kuzaphakamisa lindawo ikakhulu kwezokuthekelelwa kwayo. Kumpelaviki edluleyo bekulemidlalo yerugby njalo eFolosi, okuyikhona okuzadonsa leminye imidlalo ukuthi iqhutshelwe khona.
Kusenjalo, idolobho leFolosi lilakho ukuthi lithole isakhiwo senkundla yerugby kuminyaka emibili ezayo. Kubikwa ikhansili yalindawo isivumele inhlanganiso yeZimbabwe Rugby Union ukuthi iqhubekele phambili ngenyathelo layo.
