uMthunywa
Wayne Ncube
ABALIMI sebekhuthazwe ukufuya inkomo zochago ngoba zilenzuzo enhle njalo akuhluphi ukuzinakekela okwenza ibhizimusi le ikhule kuhle.
Ekhuluma lentatheli kaMthunywa oyingcitshi kwezokufuya kunkampani yeFarm and City Centre uMnumzana Raphael Ncube ukhuthaze abalimi ukuba bafuye inkomo zochago ngoba belakho ukuzenzela imali enhle ngokuthengisa uchago kanye lemnyama.
“Inkomo zochago zilenzuzo enhle ngoba abalimi balakho ukuthola uchago lokuthengisa baphinde bathengise lenkomo zakhona nxa zingasabatholisi uchago olubajabulisayo.
“Ibhizimusi lokufuya inkomo zochago kaliqalisanga khathesi, kusukela kudala le, abalimi bebezitholela inzuzo enhle ngebhizimusi le ngoba umkambo wochago mkhulu njalo ukhona indawo zonke,” kulandisa uMnu Ncube.
Uthe ukuze umlimi afuye inkomo zochago kudinga ukuthi umlimi abe lezibaya ezihlanzekileyo njalo lokuthi azivikele emikhuhlaneni.
“Esibayeni senkomo zochago umlimi angafaka isamende phansi abesefaka utshani obunengi. Indawo le kumele ihlale igeziswa ukuze zingahlali phakathi kwengcekeza ngoba yiyo ebangela lemikhuhlane,” kutsho uMnu Ncube.
“Ukudla kwenkomo zochago kwehlukene lokudla kwenkomo nje ngoba kakhulukazi inkomo zochago zidinga ukudla okuhlabusayo ngoba kazidli ngaphandle kakhulu njalo kumele ziqede isikhathi esinengi zisidla ukudla okuluhlaza ngoba kuyanceda ekwehliseni kwenomo lezi.
“Bana lendawo yokudlela yenkomo ehlala iluhlaza, njalo kube letswayi ngoba lenza inkomo zinathe amanzi kakhulu,” kuchaza uMnu Ncube.
Inkomo zochago zidinga i-5 litres yamanzi ukuze zehlise ilitha eyodwa yochago ngakho abalimi kabaqinisekise ukuba inkomo ziyathola amanzi amanengi.
Kuqakathekile ukuvikela inkomo emikhuhlaneni ngoba kungcono ukuvikela kulokwelapha.
Uphethe ngokuthi umlimi ulakho ukuba lendawo engayisiso sibaya yokusengela ukuze lokhu kwenzelwe lapho inkomo ezikhululeke khona ngoba zehlisa ngcono lapho,” kuphetha uMnu Ncube.
