uMthunywa
Bongani Ndlovu
ABALIMI abakubhizimusi yokufuya lokuthengisa inkomo zenyama bakhuthazwa ukuba babelolwazi lokunonisa inkomo zabo ukuze benelise ukubona ukuba labo abafuna inyama bayayithola.
Ekhuluma loMthunywa uMnumzana Shelton Zhou ongumlimi uthe ukunoniswa kwenkomo zenyama kuyibhizimusi enhle kweleZimbabwe.
“Kuqakathekile ukunonisa inkomo zingakathengiswa.
Kuleli isilinganiso senyanga esifunakalayo ngenyanga singaba yi-6 500 metric tonnes ngakho umlimi othengisa inkomo zenyama ulakho ukuthola inzuzo enhle kakhulu ngemva kokuthengisa inkomo zakhe.
“Ukunoniswa kwenkomo zenyama yindlela ethatha amalanga angamatshumi ayisitshiyagalolunye zinikwa ukudla okuzenza zenelise ukuba lesisindo esikhangelelweyo,” kuchaza uMnu Zhou.
UMnu Zhou uphinde wathi okuqakathekileyo yikuzipha ukudla lamanzi endaweni eyodwa.
“Kufanele ukuthi kulungiswe indawo yokunika inkomo lezi ukudla njalo okuqakathekileyo yikuthi indawo le ibe yindawo elamanzi lokudla okwaneleyo ukuze inkomo zingahambi imango emide zilahlekelwa ngokunye ukudla emzimbeni,”
“Akuqakathekanga ukuthi umlimi unonisa inkomo ezisesibayeni sakhe kumbe azithenge kwezinye indawo okuqakathekileyo yikuthi zibe ngumhlobo ovumayo.
Izikhathi ezinengi umhlobo we-hard mashona uyavuma ukunoniswa kuhle,” kuchaza uMnu Zhou.
UMnu Zhou uthe inkomo ezinoniswayo kufanele ziphiwe ukudla okwakha umzimba ngesikhathi zinoniswa.
“Inkomo ezinoniswayo kufanele ziphiwe ukudla okulokudla konke okuzanonisa umzimba ikakhulu ama-proteins,”
“Amanzi ahlanzekileyo njalo eneleyo lawo aqakathekile ukuze inkomo zingomi.
Kuthi ngemva kwamalanga angu-90 inkomo iyabe silomzimba olesisindo esingaletha inzuzo kumlimi,” kuphetha uMnu Zhou.
