YiNtatheli kaMthunywa
UMDLALI owake wadla ubhedu kunguqu kuleli, uCleopas “Ballotelli” Dube usenkingeni, nanko usebangwa ngamaqembu amabili kweleBotswana.
UCleopas Dube
Umdlali lo usekuqembu leJwaneng Galaxy eBotswana kodwa sekuvuke ingxabano leqembu le-Sua Flamingoes ayelidlalela selibike ukuba kulemali thile engakabhadalwa.
Kubangwa imali engange US$9 000, osekudale ukuba iSua Flamingoes yale lomdlali lo. Loba udaba lolu kukhanya lufihlwa kumaqembu womabili, iphephandaba likazulu lizwe ukuba uDube useqalisile ukulolonga ngaphansi komqeqetshi uMandla “Lulu” Mpofu, kuJwaneng Galaxy. Kungxoxo abelayo lentatheli ngoLwesibili emini, uMpofu uthe okwakhathesi kakezwa lutho ngengxabano le ngoba uphezulu kokulolonga umdlali.
“Ngikhuluma nje ngiphakathi kohlelo lokulolonga abadlali bami. Siqhuba kakuhle. Engingakutsho ngoCleopas Dube yikuthi useqenjini lami,” nguMpofu lo. Kuqembu le-Jwaneng Galaxy, uDube uzadlala labanye abadlali bakuleli uNqobizitha Masuku loDaniel Msendami, okungabanye abasuka kuqembu leHighlanders. Umqeqetshi uMpofu ungene kuSua Flamingoes ngemva kweviki efulathele elinye iqembu leBotswana iMositaoka.
Kusenjalo, iqembu labesifazane elenguqu, iHighlanders Royals leBosso 90 seziphendukile kuleli ngemva kokudlala kumqhudelwano weJwaneng Mine GM Soccer Fiesta.
