uMthunywa
YiNtatheli kaMthunywa
AQALE ngokunqoba okungatsho lutho amazwe akhangelele ukuthi adlale ngcono ku-Africa Cup of Nations (Afcon) esingena kuviki yesibili enkundleni ezehlukeneyo eziyisithupha e-Egypt.
Ngaphambili kokuqala kwe-Afcon, amazwe afana leNigeria, Senegal, Morocco, Algeria le-Egypt, abekhangelwe ukuba acobodise amazwe amanengi, ikakhulu kumidlalo yakuqala kodwa wonke aqale ngendlela engajabulisiyo.
Amazwe la alomthwalo wokutshengisa ukuthi inguqu ye-Africa imi ngaphi njalo bekufanele ukuthi aqale kuhle kodwa nxa engaqhubeka esehluleka ukuhlohla okuzwayo, kutsho ukuba manengi amazwe athenjiweyo azasala endleleni kusigaba sakuqala somncintiswano.
Kuliqiniso ukuthi indlela aqalisa ngayo amazwe ikakhulukazi athathwa njengamakhulu ebholeni lase-Africa, isuke ingajabulisi ukuthi kuzakuba njalo kodwa osekubalulekile yikuthi amazwe la athathwa njengamancane azakuba lelizwi ekutheni yiwaphi adlulela ku-last 16 lakuma-quarter final.
Ilizwe le-Egypt livule umqhudelwano ngokutshaya 1-0 iZimbabwe. Kulo umdlalo bekukhangelelwe ukuthi amaWarriors athwale nzima, umdlalo uqalisa uze uyephela. Kulumdlalo njalo, abadlali beZimbabwe batshengise impawu zokuthi ngeke bathathwe kancane nxa sebedibana lesizwe se-DRC kumdlalo wazo wokucina kuqula lika Group D.
Kwenzakale into efanayo lasenkundleni ye-Alexandia Stadium lapho iNigeria ethathwa njengezinkunzi ze-Africa, ihlohle ibhola elilodwa elingene esigabeni sesibili ukuze iqoqe impumela yonke kuBurundi ebiqala ukudlala ku-Afcon.
IMorocco yona idlale into efanayo itibuliswa yiNamibia layo engatsho lutho ku-Afcon. Umdlalo lo uze wathola ibhola emambuleni ngomzuzu owandulela owokucina futhi iNamibia yiyo ezigwaze ngowayo itshayelela ibhola egedini layo sekucacile ukuthi kuzacazelwana imiklomelo.
ISenegal ebidlala ngaphandle kwesithenjwa sikakaputeni wayo uSadio Mane, inqobe ngo 2-0 kuTanzania kodwa lawo lumdlalo ubunzima. Kumdlalo olandelayo iSenegal izadlala le-Algeria.
