uMthunywa
YiNtatheli kaMthunywa
AMATHIMU enguqu adlalela izikolo eziseSabelweni seMatabeleland South aqala namuhla ukuncintisela indawo yokuyamela lindawo kumqhugelwano wenkezo yeCopa Coca-Cola yalonyaka.
Izikolo eziyisitshiya galolunye zizangena enkundleni zibanga ukuba yintshantshu kumaqembu amankazana labafana enkundleni yesikolo seFilabusi High.
Lakwezinye izabelo izikolo zizangqikilana njalo kubangwa ukuyafinyelela kusigaba sokucina. KoBulawayo izikolo zizadlala eGifford High. Esabelweni seMat North kuzavuthiswa inkundla zeFatima High.
Kumbiko ephawulwe ngabaqoqi benkezo kuliviki, imidlalo edibanisa izabelo zonke ikhangelelwe ukuthi idlalwe ekupheleni kwalinyanga kusukela mhlaka 22 kusiya kumhlaka 24 edolobheni leGwanda.
Inkezo yeCopa Coca-Cola le yasungulwa kuleli ngomnyaka ka1989.
Imidlalo yokukhankasela ukuyafika ku-final yalinkezo iqala mhlaka 10 kuNhlangula ezinqintini zonke zelizwe.
Intshantshu zezabelo zidibana eGwanda kusukela mhlaka 22 kusiya ku-24 Ntulikazi.
Isikolo seDewure High yiso esaba yintshantshu nyakenye kuhlandla labafana ngokunqoba iRujeko 4-3 kumidlalo eyaqhutshelwa koBulawayo.
Izikolo ezedlula 200 zikhangelelwe ukuthi zincintisane kuze kuyefikwa ku-final eGwanda.
Umncintiswano lo ususekele inguqu yamantombazana njalo. Umphathisikolo weGwanda High, okuyiso isikolo esizaphatha ama-final alonyaka, uArthur Maphosa ubike ukuthi imincintiswano enjengale kumele ibe yinkuthazo kuzikolo ukuthi ziqalise ukulolonga amantombazana kunguqu.
“Abantwana abangamankazana bayaswela amathuba okuzibonakalisa kundawo ezinengi, kodwa imincintiswano yenguqu enjenge Copa Coca-Cola inikeza ithuba lokuthi abantwabethu baveze ithalenta labo.”
Emazweni afana leKenya kubikwa nyakenye bekulamathimu amantombazana edlula 200 aphatheke kulinkezo.
Abanqobi balonyaka, njengenhlalayenza, bazanikezwa ithuba lokuyamela iZimbabwe kumqhugelwano weAfrica ozahlanganisa amazwe abalisa iKenya, Uganda, Tanzania, Ethiopia, Angola, Mozambique, Zambia, Malawi, Botswana, Namibia, Rwanda, Congo, Swaziland, Nigeria leSouth Africa.
